DILI, 28 setembru 2019 (TATOLI) – Tribunal Distritál Dili, liu husi primeira interrogatóriu, sesta (27/09/2019), aplika aprezentasaun periódika ba suspeitu nain rua (2) ne’ebé envolve iha kazu Ai-mutin, Comoro, Dili, foin lalais ne’e.
Notísia Relevante : Tribunál Aplika Aprezentasaun Periodika ba Suspeitu Kazu Aimutin Tanba Kontra Polísia
Kazu ne’ebé mak akontese iha Ai-mutin konsidera kazu rua; primeiru, membru Colimau 2000 nain rua halo krime obstrusaun publika hasoru autoridade polisia ne’ebé mak previstu iha 243 iha kódigu penal Timor-Leste no liu husi desizaun Tribunal aplika aprezentasaun periódika ba suspeitu sira.
Kazu segundu, ba kazu omisídiu simples ne’ebé mós akontese iha fatin hanesan komete husi suspeitu ho inisiál NB ho BC, deskonfia sira nain rua mak hamate vítima ida nia vida. Nune’e, Ministériu Públiku akuza sira krime omisídiu simples ne’ebé mak previstu iha artigu 138 iha kódigu penal Timor-Leste.
Defeza husi suspeitu sira, Marino da Cruz de Jesus, informa, husi inísiu kedas Ministériu Públiku akuza ninia kliente nain rua omisídiu simples ne’ebé mak previstu iha artigu 138.
“Ha’u hanoin la iha indísiu forte ruma atu tama prizaun preventiva mak Tribunal aplika aprezentasaun periódika (semana ida dala ida) ba estasaun polisia ne’ebé mak besik,” informa Mariano da Cruz de Jesus, ne’ebé fó asisténsia legal ba suspeitu nain rua ne’e.
Nia hatutan, ninia kliente nain rua hela duni iha Ai-mutin, halo negosiu mak fa’an obralan no basso.
Audiénsia julgamentu nee, prezide husi Juis Yuli Pamungkas, Ministériu Públiku reprezenta husi Prokuradór Hipolito Santa no suspeitu hetan asisténsia legal husi Marino da Cruz de Jesus.
Jornalista : Domingos Piedade Freitas
Editór : Francisco Simões
