DILI, 02 outubru 2019 (TATOLI) -Rekomendasaun no pedidu husi Advogadu privadu kompañia Marino Enterprise, Pedro Aparicio Guterres, atu lider nasionál Kay Rala Xanana Gusmão, sai mediadór ba disputa rai iha Kaitehu, Postu Administrativu Bazartete, Munisípiu Liquiça, la hetan resposta pozitivu husi Xanana rasik.
Notísia Relevante : Advogadu Marino Entreprise Husu Xanana Sai Árbitru Rezolve Problema Rai Kaitehu
Xanana hateten, nia la bele sai mediadór ba disputa rai iha Kaitehu entre Marino Enterprise ho kompañia internasionál China Harbour. Maske nune’e, Xanana la esplika razaun la bele sai mediadór tuir pedidu Marino Enterprise nian.
Notísia Relevante : Disputa Rai Kaitehu, MJ Promete Sobu “Mafia” Justisa
“Ha’u la bele sai mediadór ba kazu rai Kaitheu,” hateten lider karizmátiku Kay Rala Xanana Gusmão, hodi responde Ajensia TATOLI, ohin, bainhira anima labarik sira iha Lecidere, Dili.
Notísia Relevante : Estadu Sei Halo Rekursu Ba Disputa Rai Kaitehu
Antes nee, advogadu privadu Marino Enterprise, Pedro Aparicio Guterres, husu ba Xanana Gusmão, atu bele sai mediadór hodi buka solusaun adekuada ba disputa entre Marino Enterprise ho China Harbour kona-ba rai iha Kaitehu, ne’ebé iha relasaun ho baze ba produsaun fatuk britas atu fornese ba konstrusaun Portu Tibar.
Informasaun seluk ne’ebé iha katak, molok kazu ne’e lori ba Tribunal parte rua; Marino Enterprise ho China Harbour halo ona negosiasaun naruk hahú kedas husi outubru 108 to’o marsu 2019 no China Harbour rasik aprezenta kontratu komersiál atu halo aluga rai disputa ne’e ho valór $100.000 kada tinan durante tinan tolu nia laran ($300.000). Maibé Marino Enterprise la aseita hodi hakarak husu nia valor kontratu purvolta $150.000 kada tinan ho durasaun tinan tolu ($450.000). Tanba ne’e China Horbour dada aan no Marino Enterprise lori ba to’o Tribunal.
Jornalista : Domingos Piedade Freitas
Editór : Francisco Simões
