DILI, 11 outubru 2019 (TATOLI) – Ministra Finansa (MF) interina, Sara Lobo Brites, espera katak ofisiál finansa hosi ajénsia autónoma sira bele prepara relatóriu orsamentál ho di’ak tanba partisipa ona formasaun ne’ebé oferese hosi MF liuliu Diresaun Nasionál Tezouru durante semana rua.
“Hosi formasaun ne’e no matéria sira ne’ebé fó durante formasaun bele akapta hodi implementa iha serbisu loroloron. Importante mós imi (pesoál finansa) atu hatene katak ohin loron ne’e kontabilidade iha ligasaun metin, ema hatene de’it informátika la’ós hanesan uluk hatene iha livru boot ida, maibé agora laiha ona, buat hotu dijitaliza hotu entaun esforsu mós atu iha koñesimentu iha excel tanba la’ós halo fali relatóriu ho word nune’e mós koñesimentu iha kontabilidade”, hateten Ministra Finansa ein funsaun ne’e hodi halo enserramentu ba formasaun nasionál kona-ba kontabilidade no relatóriu finanseiru setór públiku iha salaun MF, Aitarak-Laran, ohin.
Atuál Vise-Ministra Finansa ne’e mós husu atu pesóal ne’ebé hetan ona formasaun hosi MF labele muda tun-sa’e ba-mai para fahe fali ninia koñesimentu ba ema seluk nune’e bele iha efesiénsia no fahe fali tempu ba área sira seluk.
“Formasaun ne’e sei kontinua, ne’ebé futuru oinsá halo mais organizadu para inklui hotu matéria hothotu la’ós de’it ba tezouru más hanoin importante atu hatene mós iha orsamentu, aprovizionamentu, liuliu iha área kontrolu auditoria nian”, afirma Sara Lobo.
Governante ne’e salienta formasaun ne’e parte hosi programa Governu nian ba desentralizasaun. Iha tinan 2016 no 2017 MF hahú desentraliza funsaun finansa públika ba ajénsia autónoma no munisípiu sira.
Líder másima Finansa ne’e kongratula mós ba formadór sira ne’ebé maka inisiativa rasik hodi halo formasaun ne’e, nune’e prepara ofisiál finansa sira hosi munisípiu no ajénsia autónoma sira bele prepara orsamentu no halo relatóriu finanseiru setór publiku tuir prosedimentu ne’ebé estabelese ona.
Hahú iha 30 setembru ne’e, Diresaun Nasionál Kontabilidade no Regulasaun Finanseira (DNKRF) MF realiza formasaun durante semana rua ho objetivu kapasita funsionáriu ajénsia autónoma ne’ebé hala’o kna’ar iha área kontabilidade no relatóriu finanseira.
“Formasaun ne’e atu kapasita funsionáriu ne’ebé serbisu iha área finansa liuliu ida ne’ebé maka servisu iha kontabilidade no regulamentu finanseira nian. Treinamentu ida ne’e presiza hala’o bazeia ba monitorizasaun ba desentralizasaun ba iha ajénsia autónoma tuir fali munisípiu no mós liña ministériu sira.
Diresaun Jerál Tezouru sira halo mós monitorizasaun atu haree oinsá lala’ok desentralizasaun ne’ebé hala’o hosi ajénsia autónoma, munisípiu no liña ministériu sira”, afirma Diretora Jerál Tezouru interina, Regina de Jesus Soares, foin lalais ne’e.
Regina de Jesus Soares esplika katak bazeia ba monitorizasaun ne’e nota katak ajénsia autónoma no mós munisípiu sira sei iha koñesimentu mínimu, liuliu iha área kontabilidade no regulamentu finanseiru nian.
Nune’e bazeia ba rezultadu ne’e, ekipa Diresaun Jerál Tezouru ne’ebé atu tun bá halo monitorizasaun sira nota katak tezouru presiza halo buat ruma atubele aumenta kapasidade ne’ebé kle’an atubele hala’o funsaun ne’e ho di’ak iha futuru.
Diretora ne’e dehan, dala barak rona katak membru Parlamentu sira kestiona ajénsia autónoma sira prepara sira-nia relatóriu rasik tanba ne’e maka tenke prepara sira ho di’ak atubele iha koñesimentu molok prepara sira-nia relatóriu finanseira tuir prosedimentu sira ne’ebé iha.
Formasaun ne’e ba dala rua ona, primeiru hala’o ona iha munisipiu 12 iha maiu 2019, no iha etapa daruak ne’e partisipa hosi ajénsia autónoma 11 no matéria ne’ebé aprezenta liuhosi vídeo.
Jornalista : Antónia Gusmão
Editora : Maria Auxiliadora
