DILI, 23 outubru 2019 (TATOLI) – Presidente Asosiasaun Majistratura Jurídiku Timor-Leste (AMJTL), Antonino Gonçalves, husu juiz sira iha Tribunal Distritál Dili (TDD) atu evita pronunsia arguido sira moras mental iha julgamentu laran.
Notísia Relevante : Arguido Tenta Soke Aviaun Sriwijaya Sofre Mental
Nia hateten, juiz sira la estuda no la hatene psikolójika no mental ema ida nian tanba sira la estuda kona-ba ema nia saúde no psikolojia. Tanba ne’e, molok pronunsia, di’ak liu lori arguido refere ba halo konsulta iha médiku espesialista psikolojia.
“Ita la bele julga ema bulak, ita so hatene de’it kestaun pratika, juis julga ho bazeia ba lei, konsiénsia, ema bulak nee nia atitude nee oinsá, mas para atu hatete nia bulak, haruka de’it ba Ospitál no ba doutór psikolojia sira bele halo analiza katak nia deskonfia moras mental ou lae,” esplika Antonino Gonçalves, ohin, ba jornalista sira iha Dili, relasiona ho kazu arguido ida ne’ebé tenta atu soke aviaun Sriwijaya Air, foin lalais ne’e, dehan moras mental.
Nia hateten, juiz ida hatene kondisaun arguido ida nian moras mental ou lae, kuandu iha julgamentu laran, arguido ko’alia tun-sa’e, entaun tenke suspende prosesu hodi hein arguido di’ak tiha mak mai halo julgamentu.
Antonino Gonçalves hatutan, kabe ba arguido ida atu soke aviaun ne’e iha ona a prizaun preventiva, la signifika nia sala ona. Maibé halo prevensaun iha prizaun preventiva para evita arguido la bele halo arbiru.
Jornalista : Domingos Piedade Freitas
Editór : Francisco Simões
