VIQUEQUE, 11 novembru 2019 (TATOLI) –Postu Administrativu Uatucarbau, Munisípiu Viqueque, sempre hetan saran area konflitu. Grupu juventude sira ou komunidade sira sempre tam iha konflitu entre sira ho sira ho natureza kazu oioin.
Notísia Relevante : Autoridade Uatucabarau Uza Lisan Rezolve Disputa Sivíl
Iha kazu asalta malu entre grupu, iha kazu violénsia doméstika no kazu lanu baku malu to’o kazu hadau malu rai. Maibé, dezde juñu to’o fulan ikus outubru, tinan ne’e, juventude sira kolabora malu di’ak tebes hodi garante no asegura dame no la iha violénsia iha Uatucarbau laran.
Segundu Komandante Eskuadra Polisia Uatucarabau, Alcino Alves, kontinua husu populasaun no juventude hotu mantein unidade no armonia iha Uatucarbau laran hodi prepara-an simu dezenvolvimentu ne’ebé mai daudaun ona, liu-liu projetu boot tasi mane nian.
“Ha’u hanoin iha Uatucabarau dezde simu orden iha juñu to’o agora la iha kazu ne’ebé mak akontese. Juventude sira kolabora malu di’ak loos hodi mantein pás no unidade,” informa Alcino Alves, ba Ajénsia TATOLI iha Uatucarbau, foin lalais ne’e.
Nia apela nafatin ba komunidade ho juventude sira atu kontinua mantein armonia iha loron boot Natal, 25 dezembru no tinan foun, 01 janeiru 2020. Nune’e, Uatucarbau-oan sira bele festeja loron boot ne’e iha ambiente dame no domin.
Administradór Postu Administrativu Uatucarbau, Mateus Martins Pinto, orgullu ho nia komunidade no nia juventude sira ne’ebé kontinua kolabora malu hodi garante pás iha Uatucarbau laran.
Nia mós agradese ba autoridade polisia eskuadra Uatucarbau, Ofisial Polisia Suku no autoridade ho konsellu suku hotu iha Uatucarbau laran, ne’ebé kontinua komunika ba malu no kontinua ko’alia ho komunidade sira atu kria situasaun hakmatek no pás durante ne’e no ba oin nafatin.
Jornalista : Domingos Piedade Freitas
Editór : Francisco Simões
