AIFAESA Husu Alfándega Atu ‘Atensaun’ ho Produtu Importasaun
DILI, 20 novembru 2019 (TATOLI)-Koordenadór Autoridade Inspesaun Fiskalizasaun Atividade Ekonómika no Sanitária (AIFAESA), Abílio Oliveira Sereno, husu ba Autoridade Alfándega atu haree no kontrola mós produtu importasaun ne’ebé tama mai territóriu, liuhosi portu, aeroportu no fronteira terrestre Timor-Leste.
Notísia Relevante : AIFAESA Halo Koordenasaun ho Xefe Suku
“Ami husu ba Alfándega atu haree ba produsaun tama-sai labele haree de’it ba AIFAESA, tanba ami só haree de’it ba sasán ne’ebé mak tama ona mai laran. Antes atu tama Alfándega mak iha kompeténsia tomak atu haree,” hateten Abílio Oliveira Sereno ba TATOLI iha nia servisu fatin, Dili, kuarta (20/11/2019).
Nia mós husu ba Ministru Koordenadór Asuntu Ekonómiku (MKAE) atu husu responsabilidade ba produtu ne’ebé tama nune’e haree mós ba nia kualidade.
Nia esklarese, AIFAESA mosu la’ós atu halo inimigu ba negosiante ka emprezáriu, ne’e la’e. Maibé , hakarak hamutuk ho konsumidór sira no mós ho negosiante sira atu la’o tuir dalan no regra ne’ebé mak loos.
Notifika Infrasór sira
Iha fatin hanesan Xefe Departamentu Asuntu Jurídiku no Kontra-ordenasaun (DAJC-sigla portugés), Domingos Nunes, informa, bainhira emprezáriu komete inflasaun, AIFAESA sei halo notifika hodi tuir prosesu legais.
“Husi prosesu ita hahú, ita loke notifika na’in ba empreza sira ne’ebé mak komete ba infrasaun tuir prosesu notísia ne’ebé iha,” Domingos nunes esplika hodi mensiona tan, bainhira emprezáriu ne’ebé komete mós iha direitu atu halo autodefeza ba sira-nia aan.
“Bainhira sira halo ona autodefeza iha AIFAESA. Ami halo notifikasaun ho loron 15 hodi presta sira-nia deklarasaun ba saida mak momentu akontese halo inspesaun ba sira-nia fatin,” nia tenik.
Nia fó ezemplu, emprezáriu komete fa’an sasán liu prazu ka atividade la iha lisensa komérsiu ka karta lisensa mate, hirak ne’e tama kategoria infrasaun ne’ebé kontra dekretu lei 23/2009.
Apresia ho AIFAESA
Liuhosi sorumutuk entre AIFAESA ho Xefe Suku sira Dili laran tomak, Xefe Suku Bidau Santa-Ana, João Paul de Andrade, hato’o nia apresiasaun ba AIFAESA nia programa no inisiativa hodi envolve autoridade suku iha asaun prevensaun ba sasán sira iha merkadu.
“Lider komunitária hakarak koopera duni ho AIFAESA liuliu oinsá atu kria oráriu para tun diretamente ba suku sira hodi haree ba emprezáriu ne’ebé mak hela iha suku,” hateten João Paul de Andrade.
Xefe Suku sira prontu atu kolabora ho AIFAESA hodi halo asaun prevensaun ba hahán.
Jornalista : Osória Marques
Editór : Francisco Simões
