DILI, 29 novembru 2019 (TATOLI)-Komandu Polisia Munisípiu Dili, detein joven na’in hitu, ohin dadeer, tanba envolve iha kazu krime balun.
Suspeitu sira ne’ebé PNTL detein sela polisia Caicoli kompostu hosi suspeitu na’in lima (5) ho inisiál, JG, ELS, OCC, RSC no LP hetan kaptura iha área Beto Berat, Comoro, tanba viola lei númeru 5/2017 kona-ba pratika arte marsiál sira nian no rituál, suspeitu JFR mandatu detensaun no suspeitu TFF ba kazu la iha karta kondisaun no viola lei sinais tránzitu.
Suspeitu na’in hitu ne’e parte Polisia sei investiga liu tiha oras 72 maka sei aprezenta ba Ministériu Públiku hodi prosesa tuir lei.
Segundu Komandante Polisia Munisípiu Dili, Superintendente Asistente Polisia, Euclides Belo, ba jornalista iha Komandu Polisia Munisípiu Dili iha Caicoli, informa, suspeitu nain hitu ne’e maioria joven ho idade eskolár.
Komandu Polisia Dili mós agradese ba povu tomak durante selebrasaun loron Proklamasaun Independénsia ba dala-44 (28 novembru 1975-2019) iha Dili hala’o ho ambiente dame no la mosu kazu no insidente ruma.
Jornalista : Eugénio Pereira
Editór : Francisco Simões
