DILI, 28 janeiru 2020 (TATOLI) – Ministériu Públiku (MP) halo akuzasaun ba arguido na’in neen (6) ho krime tolu; ofensa integridade fízika simples, ofensa integridade agravadu ho arma branka tanba halo asaltu ho uza sasan kro’at ba lezadu sira.
Arguido na’in neen, kompostu husi JJG, JRF, JCB, ZB, VC no DAJP, ho intensionalmente halo asaltu ba lezada sira bainhira lezadu sira kondús motor liuhusi sira nia oin iha loron 04 maiu 2019.
Arguido sira lori katana taa lezadu FS nia kabas ne’ebé rezulta lezadu hetan suku pontu 21 iha parte kotuk no suku pontu 4 iha parte liman no taa mós lezadu NA nia hirus matan hodi ba halo kedas tratamentu intensivu iha Sentru Saúde Comoro, Dili.
Iha deklarasaun arguido na’in haat hanesan JRF, ZB, VC ho JCB rekoñese katak akuzasaun husi Ministériu Públiku la loos hotu.
Maibé, Ministériu Públiku la aseita, tanba arguido sira nega faktu ne’ebé MP atribui ba sira, no MP la aseita atu hasai arguido na’in rua husi prizaun preventiva, tanba kazu nee arte marsiál.
Rona tiha husi parte Ministériu Públiku, Defeza no arguido sira, Tribunál adia fali audiénsia julgamentu ba loron 24 marsu 2020, tuku 14:00 Otl, nune’e, Tribunál sei haruka karta ba na’in ba kompañia TP, hodi haree fila-fali kamera vijilánsia (CCTV), relasiona ho arguido nain neen nia deklarasaun.
Audiénsia julgamentu nee, prezide husi Juiz koletivu Afonso Carmona, António Fonseca, Evangelino Belo, no Ministériu Públiku reprezenta husi Prokuradór Domingos Barreto, arguido sira hetan asisténsia legál husi Advogadu privadu Marçal Mascarinhas.
Jornalista : Domingos Piedade Freitas
Editór : Francisco Simões
