DILI, 30 janeiru 2020 (TATOLI) – Tribunal Distritál Dili (TDD) seidauk husu ba Ministériu Públiku no defeza atu halo alegasaun final ba kazu sona Nelson Madeira iha Elemloi tanba sei konfirma ho provas liu husi CCTV.
Tuir akuzasaun husi Ministériu Públiku katak iha loron 25 marsu 2019, iha fatin Elemloi, Delta III, Comoro, Dili, tuku 24: 00 OTL, lezadu Nelson Madeira sai ba hamriik iha loja oin, tanba rai manas, derrepente arguido ida ho nia kolega husu ba lezadu hodi dehan ‘serbisu iha ne’e no nia hatán dehan nia servisu iha ne’e no hela iha ne’e. Nune’e, arguido ida husi kotuk lori tudik sona iha nia kotuk laran, nune’e nia is la iha tiha, maibé arguido kontinua sona tan, bainhira dolar tama iha karreta ida nia okos, hodi salva-aan.
Arguido sira foti nia telefone hodi halai, tanba ne’e nia sai hosi karreta okos hodi fila ba uma, maibé to’o iha ema fa’an modo nian oin Polisia intelijente ida telefone Ambulánsia mai tula nia hodi ba iha Ospitál.
Arguido hamutuk ho nia kolega halai tiha ba Delta I no nia rasik la koñese nain rua ne’e.
Konsekuénsia husi arguido nia aktu ne’e halo lezadu hetan kanek to’o agora seidauk di’ak. Arguido APM mós lori halai telemovel Samsung ho valor $ 00.00 no arguido kaer sasán kro’at ne’ebé lei bandu.
Arguido hanesan autór material ba konkursu krime ofensa ba integridade fízika grave previstu iha artigu 146 nu.1, krime roubu previstu iha art 253 nu.2 hotu-hotu husi kódigu penal no mós krime armas branka.
Arguido APM iha audiénsia julgamentu deklara katak akuzasaun ne’ebé mak Ministériu Públiku akuza ba nia parte konsidera sala hotu tanba momentu ne’ebá kalan iha uma de’it, la ransu ema no foku servisu halo Tahu, la sona ema, la tuir arte marsiais ida, maibé PNTL ba kaer de’it iha uma iha tuku 03:00 Otl iha kampu Saun José Aimutin. Nune’e mós, lezadu Nelson Madeira, katak nia la koñese arguido APM ho nia kolega sira tamba oin halai.
Audiénsia julgamentu ne’e prezide husi juiz koletivu Antonio Fonseca, Afonso Carmona, Evangelino Belo no tenke adia fali julgamentu ba loron 14 fevereiru 2020, tuku 08:30 Otl, hodi haree CCTV.
Ministériu Públiku reprezenta Prokuradór Reinato Bere Nahac, arguido hetan asisténsia legal husi defensór públiku, Germano Guterres.
Jornalista : Domingos Piedade Freitas
Editór : Francisco Simões
