Deputada Norberta Eleita Ba Sekretária Meza PN no Deputadu António Eleitu Ba Vise-Sekretáriu

DILI, 02 juñu 2020 (TATOLI)— Bankada Frente Revolucionária de Timor-Leste Independente (FRETILIN), Deputada Lídia Norberta eleita ba Sekretária Meza Parlamentu Nasionál foun no Bankada Kmanek Haburas Unidade Nacional Timor Oan (KHUNTO), Deputadu António Nobre Tilman eleitu ba Vise-Sekretáriu Meza Parlamentu Nasionál foun.
Kompozisaun meza Parlamentu Nasionál komposta hosi Prezidente Parlamentu Nasionál, Deputadu Aniceto Guterres hosi Frente Revolusionária Timor-Leste Independente (FRETILIN), Vise-Prezidente Parlamentu Nasionál, Deputada Maria Angelina Sarmento Lopes hosi Partidu Libertasaun Populár (PLP), Segundu Vise-Prezidente Parlamentu Nasionál, Deputadu Luis Roberto hosi Kmanek Haburas Unihdade Nasionál Timor Oan (KHUNTO).
Entretantu, Sekretáriu Meza Parlamentu Nasionál foun Deputada Lídia Norberta hosi FRETILIN no Vise-Sekretária Meza Parlamentu Nasionál, Deputadu António Nobre Tilman hosi KHUNTO no Segundu Vise-Sekretária Meza Parlamentu Nasionál mantein ho Deputada Regina Freitas hosi PLP.
Prezidente Parlamentu Nasionál, Aniceto Guterres, fó-sai katak kandidadura ba eleisaun sekretária no vise-sekretáriu ba meza PN lista únika. Rezultadu votasaun a-favór 41 kontra O no abstensaun 1. Entretantu, deputadu/a sira hosi Bankada CNRT no UDT/FM auziénsia.
“Depois eleisaun ida-ne’e kompozisaun meza kompletu ona. Tuir Rejimentu Parlamentu Nasionál artigu 19 alínea 6 ha’u sei komunika ba Prezidente Repúblika no Primeiru-Ministru,” dehan Aniceto Guterres, liuhosi plenária, tersa ne’e.
Parlamentu Nasionál halo mudansa ba sekretária meza no vise sekretária meza tanba Sekretária Meza PN sesante, Maria Terezinha Viegas hosi CNRT no Vise-Sekretária PN, Isabel Maria Barreto Freitas Ximenes hosi Bankada UDT/FM.
Xefe Bankada KHUNTO, Deputada Olinda Guterres, fó parabens ba deputadu sira-ne’ebé lidera sekretária meza no vise-sekretária.
Tuir Rejimentu Parlamentu Nasionál (RPN) artigu 19 (Eleisaun ba Vise-Prezidente, Sekretáriu no Vise-Sekretáriu), alínea 1 hanesan vise-prezidente sira, sekretáriu no vise-sekretáriu sira-ne’e eleitu ba lejizlatura ida.
Alínea 2 artigu ne’e subliña, hosi kandidatura ba kargu vise-prezidente, sekretáriu no vise-sekretáriu Parlamentu Nasionál tenke subskreve husi mínimu deputadu na’in-ualu no máximo na’in sanulu-resin-rua, no aprezenta liuhusi lista fechada, kompleta no nominativa.
Alínea 3 hosi artigu ne’e hateten kandidatura ba kargu previstu iha númeru anteriór tenke aprezenta ba Prezidente Parlamentu to’o 24 horas molok data ne’ebé marka ba eleisaun.
Alínea 4 hosi artigu ne’e esplika, eleisaun sei hala’o tuir eskrutíniu sekretu, no sei buka atu asegura katak kompozisaun lista konkorrente ida-idak, konforme posível, iha partisipasaun proporsionál husi bankada parlamentár ne’ebé iha reprezentasaun iha parlamentu.
Nune’e alínea 5 hosi artigu ne’e akresensta, kandidatu sira sai eleitu bainhira sira hola parte iha lista ne’ebé hetan maioria absoluta husi votu Deputadu eleitu sira-nian.
Alínea 6 hosi artigu 19 ne’e dehan, remata tiha reuniaun, Prezidente Parlamentu sei komunika kompozisaun meza nian ba Prezidente Repúblika no ba Primeiru-Ministru.
Notísia Relevante: Bankada Maioria Parlamentár Destitui Ona Maria Terezinha Viegas no Isabel Maria Barreto
Jornalista : Evaristo Soares Martins
Editór : Cancio Ximenes

