DILI, 17 jullu 20202 (TATOLI) – Ministériu Petróleu no Minerál (MPM) liuhosi Insitituto Geolojia no Petróleo (IPG) lansa portál online hanaran WebGIS-IPG, ho enderesu: https://gis.ipg.tl/webgis/ hodi divulga informasaun ba públiku konba-ba relatóriu investigasaun sientífika no rekolla dadus Jeolojia, Gás, Petróliu, Rekursu Minerál, Jeolojia no idrojeolojia iha territóriu laran tomak.
Ministru Petróleu no Minerál, Victor da Conceição Soares, hateten lansamentu portál ne’e objetivu prinsipál ho baze dekretu-lei númeru 33/2012 ne’ebé estabelese iha loron 18 jullu 2012 atu divulga sistema informasaun jeográfika atu públiku hatene informasaun sira iha rai-laran.
“Ita lansa ona sistema informasaun liuhosi liña internet atu ema sira iha rai-laran no rai-li’ur bele asesu ho lais liu atu dada mós investidór mai kompete iha setór sira ne’e,” tenik Ministru Victor hafoin lansa portál iha edifísiu IPG, Delta 1, Elemloi, sesta ne’e.
Portál ne’e mós sei divulga no promove informasaun sira kona-ba IPG ninia ezisténsia no progresu servisu.
Governante ne’e kontinua dezafía IPG atu rervisu ho resposabilidade, liliu halo investigasaun ba pontensialidade rekursu petróleu no minerál iha rai-maran no tasi.
Sorin seluk, Prezidente IPG, Hélio Casimiro Guterres, hateten lansamentu ne’e hanesan pasu istóriku tanba durante ne’e públiku akompaña IPG halo estudu ba rekursu petróleu no minerál, maibé la asesu ninia rezultadu.
“Ita sei divulga informasaun sira kona-ba ita-nia riku-soin, oinsá mak rai halai no bee sa’e atu públiku sira bele asesu,” nia subliña.
Tuir dekretu-lei ne’ebé atribui ona ba IPG, atubele sai sentru divulgasaun informasaun no sentru jestaun ba dadus sira ne’ebé ligadu ho jeolojia no jeosiénsia iha Timor-Leste.
WebGIS ne’e hanesan biblioteka ida hodi tau no divulga kualkér dadus investigasaun sientífika no rekolla dadus Jeolojia, Gás, Petróleu, Rekursu Minerál, risku jeolojia no idrojeolojia iha territóriu laran tomak.
Jornalista: Florêncio Miranda Ximenes
Editora: Julia Chatarina
