DILI, 07 agostu 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, ohin, hamutuk parseiru Timor–Leste Police Development Program (TLPDP) halo enserramentu ba kursu investigasaun kriminál ba komandante eskuadra polísia na’in-20.
Komisáriu Faustino da Costa, dehan kursu investigasaun kriminál ba membru sira ne’ebé suporta husi parseiru TLPDP hodi hasa’e rekursu membru sira-nian hodi profesionaliza sira -nia servisu investigasaun ba lokál krime ne’ebé importante tebes.
Nia hatutan, mezmu kursu ne’e hala’o ho tempu semana ida de’it, importante liu maka membru sira bele halo servisu investigasaun tuir lei haruka, oinsá maneja kualkér problema no kazu ne’ebé PNTL atende bele suporta evidénsia forte ba Ministériu Públiku hodi aprezenta ba Tribunál.
Nia hatutan, Servisu Investigasaun Kriminál PNTL sempre koopera ho Ministériu Públiku (MP) nu’udar na’in ba asaun penál no Polísia fasilita investigasaun hodi deteta no identifika problema hirak ne’ebé mosu no buka kazu ne’ebé iha ho dadus forte ba MP atu prosesa tuir lei.
Kursu ne’e hala’o iha loron 3 too loron 7 agostu 2020, no foka liu iha área Investigasaun Kriminál, oinsá hakerek auto notísia, distinge kazu flagrante de leitu tuir Kódigu Prosesu Penál no Kódigu Penál Timor-Leste.
Iha fatin hanesan, Segundu Komandante Sentru Formasaun Polísia (CFP), Superintendente Boavida Ribeiro, agradese formasaun halo hodi reforma investigasaun sira-nia servisu.
Eis Komandante Servisu Migrasaun Boavida Ribeiro, dehan kursu aprezenta matéria importante ne’ebé fó direita ho parseiru TLPDP.
“Importante husi kursu investigasaun ida ne’e hakarak hasa’e komandante eskuadra sira-nia rekursu oinsá maka halo prosesu identifikasaun kazu krime sira liga ho asaun flagrante de leitu inklui ezaminasaun ba lokál de krime para polísia aprezenta provas ruma ba Ministériu Públiku bele ba ho dadus koretu,” dehan Boavida.
Nia hatutan, matéria báziku ne’ebé komandante eskuadra sira hetan ona durante formasaun bele aplika iha sira-nia servisu investigasaun nian iha terrenu hodi fó susesu ba servisu susesu servisu polísia nian atu implementa lei no orden iha Timor-Leste.
Komandu Sentru Formasaun Polísia mós sei kontinua servisu hamutuk ho TLPDP ba oin sei kontinua realiza formasaun segundu faze hodi kompleta ba Komandante Eskuadra na’in-65.
Jornalista : Eugénio Pereira
Editór : Francisco Simões
