DILI, 11 agostu 2020 (TATOLI)-Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa iha tempu badak sei re-ativa tan eskola 10 iha zona Sentrál Oé-Cusse tanba prenxe ona padraun prevensaun surtu COVID-19.
Arsénio Bano relata asuntu ne’e hafoin halo enkontru ho Vise Ministru Edukasaun Juventude no Desportu, António Guterres iha edifísiu Zona Espesiál Ekonomia Sosiál Merkadu (ZEEMS), Faról Dili, tersa ne’e.
Notísia Relevante :RAEOA foin re-ativa eskola tolu
Nia dehan eskola sira iha Zona Sentrál ladun iha risku ba transmisaun pandemia Globál surtu coronavirus, maibé preokupa liuliu maka eskola sira besik fronteira terrestre ho Indonézia.
“Ha’u hakarak dehan katak eskola 10 iha Sentrál Oé-Cusse preparadu ona atu loke, ha’u sei ko’alia liután ho Sekretáriu Edukasaun Rejionál atu haree liután nesesidade saida mak presiza atu eskola sira-ne’e loke bele komplete ona ho fasilidade sira,” nia dehan.
RAEOA iha eskola hamutuk 100 hahú husi pre-eskolár, Sekundária no Tékniku Vokasionál, maibé foin re-abertura eskola hamutuk tolu, enkuantu 97 seidauk komesa ninia prosesu aprendizajen ba estudante.
Kona-ba eskola sira iha área fronteira, Prezidente RAEOA ne’e dehan sei hamutuk ho Ministériu Edukasaun Juventude no Desportu atu estuda mekanizmu no estratéjia di’ak molok re-abertura prosesu aprendizajen hodi evita risku transmisaun moras mundiál coronavirus.
Entretantu, Vise Ministru Edukasaun Juventude no Desportu, António Guterres, hateten eskola sira iha fronteira risku atu lori transmisaun moras coronavirus tanba nasaun viziñu Indonézia sei rejista kazu COVID-19 ho númeru boot.
“Ami na’in rua halo ona koordenasaun hodi haree metodolojia, estratéjia no mekanizmu saida mak atu uza iha Oé-Cusse, tanba ita hatene Oé-Cusse Sentrál liu baliza ho nasaun viziñu Indonézia, ita presiza halo diskusaun ida di’ak hodi prevene ita-nia ema sira iha ne’ebá,” reforsa António Guterres.
Eskola tolu ne’ebé re-ativa ona sira-nia prosesu aprendizajen ba estudante sira maka Eskola Sentru Aprendizajen no Sentru Eskolár (CAFÉ-sigla portugés), Eskola Tékniku Vokasionál Ida no Privada ida.
Jornalista : Tomé Amado
Editór : Agapito dos Santos
