DILI, 12 agostu 2020 (TATOLI)-VIII Governu Konstitusionál liuhosi Ministériu Petróleu no Minerál (MPM) hatudu kompromisu atu hamutuk ho órgaun reguladór Autoridade Nasionál Petróleu no Minerál (ANPM) no empreza estatál Timor GAP,ep hodi mellora investimentu iha setór petróleu no gás.
Ministru Petróleu no Minerál, Víctor da Conceição Soares, hateten mudansa polítika no situasaun surtu COVID-19 ne’e, Governu hahú halo ona ajustamentu atubele mellora investimentu ba setór petróleu no gás iha Tasi Timór.
“Governu iha obrigasaun atu servisu hamutuk ANPM no Timor GAP atu konvese empreza sira atu mai investe iha ita-nia rai. Ita lansa ona bloku barak iha rai maran no tasi laran,” tenik Ministru Víctor ba Agência Tatoli iha Palasiu Governu, kuarta ne’e.
Governante ne’e dehan, atu mellora polítika investimentu, hafoin iha mudansa Governu, implika mós ba orientasaun polítika foun ne’ebé Governu halo restruturasaun hafoin halo auditoria.
“Hafoin rezultadu ne’e mak Governu halo ajustamentu polítika foun ba atividade hotu ne’ebé relasaun ho projetu Tasi Timór, liuliu atividade petrolífera,” nia akresenta.
Hafoin situasaun polítika no surtu COVID-19, iha empreza balun maka dada-an ho razaun konfinamentu ne’ebé halo atividade sira paradu.
“Ita aproveita tempu ne’e, Governu halo ajustamentu polítika no hafoin hahú filafali bainhira situasaun COVID-19 ramata atubele hala’o aktividade ho normál. Tanba daudaun empreza sira ne’e mós husu hela atu halo komunikasaun no kontinua nafatin atividade produsaun mina no gás iha Tasi Timór nian,” nia hatutan.
Nune’e, nia informa Governu liuhosi MPM hahú halo diskusaun ba elaborasaun Orsamentu Jerál Estadu (OJE) 2020 no 2021 atu mellora polítika investimentu iha área petróleu no gás.
Timor-Leste liuhosi órgaun reguladór ANPM halo ona promosaun ba konkursu públiku mina no gás hamutuk bloku 18, kompostu husi 11 iha tasi-laran no hitu iha rai-maran.
ANPM mós esforsu halo promosaun liuhosi konferénsia online iha semeira globál ne’ebé organiza hosi empreza IN-VR Oil & Gas ba konkursu públiku mina no gás hamutuk bloku 18 atu loke dalan ba empreza estranjeiru sira bele mai investe.
Governu ho ANPM mós esforsu maka’as atu haree ba rejime fiskál, rejime legál ein termu kontratu fahe produsaun, nune’e bele hada’u ema-nia konfiansa mai investe ba bloku sira ne’e.
ANPM halo ona promomosaun ba nasaun barak hanesan Singapura, Londres, Abu Dabi, Estadu Unidu Amérika, Austrália no seluk tan, ne’ebé hatudu pasu pozitivu tanba empreza balun hatudu ona interese no submete ona dokumentu sira ba pre-kualifikasaun no balun mós hola ona dadus lubuk ida iha bloku 18 ne’e rasik.
Iha loron 3 outubru 2019, ANPM ho apoiu husi IN-VR Oil & Gas realiza simeira internasionál Timor-Leste Oil & Gas Summit 2019 no iha biban ne’e Governu Timor-Leste liuhosi Primeiru-Ministru, Taur Matan Ruak lansa ona konkursu públiku ba mina no gás hamutuk bloku 18.
Rekursu naturál iha bloku hirak ne’e, nia estrutura fatuk no basia identifika ona iha estudu sízmiku katak kamada fatuk iha potensialidade boot bele akumula petróleu no gás.
Jornalista: Florêncio Miranda Ximenes
Editora: Julia Chatarina
