PNTL suspende Ajente FSF ne’ebé baku joven no katuas ida iha Eskuadra Atabae

DILI, 12 agostu 2020 (TATOLI)- Komandu Polísia Nasionál Timor-Leste (PNTL) liuhusi Departamentu Justisa PNTL hasai ona desizaun provizóriu hodi suspende servisu Ajente Polísia ida ho inisiál FSF ne’ebé halo agresaun fízika hasoru joven ida ho inisiál AB no katuas ida iha edifísiu Eskuadra Polísia Postu Administrativu Atabae, Munisípiu Bobonaro.
Notísia Relevante : Komandu PNTL Kondena Aktu Ajente Polísia Ida Baku Joven Ida iha Atabae
Komandu PNTL fó suspensaun ba membru ne’e, tanba iha loron 4 jullu 2020, halo agresaun fíziku kontra direitu umanu no aat liután halo gravasaun vídeo ne’ebé viral iha rede sosiál Facebook ho durasaun 0:37 minutu.
“Loos duni Ajente FSF ne’e oras ne’e daudaun submete ona ba iha prosesu investigasaun, no ita hein katak iha tempu badak nia sei hetan prosesu dixiplinár husi Komandu Jerál PNTL,” informa portavós PNTL, Superintendente Xefe Arnaldo Araújo, ba jornalista liuhusi konferénsia imprensa, ohin, iha Kuartél Jerál PNTL, Caicoli, Dili.
Komandante Arnaldo hatutan, membru ne’e mós envolve tan iha kazu hodi halo gravasaun vídeo ho durasaun 1:45 minutu uza farda baku no basa vítima katuas ida iha Eskuadra Atabae nian.
Antes ne’e, Segundu Komandante Jerál PNTL, Komisáriu Mateus Fernandes lamenta bainhira haree aktu violénsia ne’ebé oknum polísia FSF rasik halo hodi grava iha ninia telefone.
Mateus Fernandes dehan, parte Komandu PNTL hein hela relatóriu investigasaun husi Komandu Munisípiu Bobonaro nian hodi foti desizaun ba membru ne’e.
Jornalista : Eugénio Pereira
Editór : Francisco Simões

