DILI, 13 agostu 2020 (TATOLI)-Ajénsia Internasionál World Food Program (WFP), kinta ne’e oferese ai-han ba Estudante Ensinu Báziku Filiál Lelaus Dare I,II,III hamutuk ema na’in 189 iha Munisípiu Dili nian.
Country Director WFP iha Timor-Leste, Dageng Liu, hateten projetu pilotu ne’e hodi koresponde ba situasaun pandemia globál surtu COVID-19 tanba afeta ba programa merenda eskolár ne’ebé daudaun ne’e seidauk funsiona ho di’ak iha eskola sira.
Ohin, kada estudante simu foos grama 200, koto grama 100, mina bimoli mili litru 100, manu tolun rak ida, modo tahan no hudi.
Projetu Pilotu WFP nian ne’e la’ós atu tein iha eskola sira, maibé fó ba estudante sira idaidak lori fila ba sira-nia uma hodi tein lorloron hodi konsume molok bá eskola.
“WFP realija programa pilotu ne’e tanba atu apoiu ita-nia oan sira, bainhira sai husi uma kabun labele mamuk, sira tenki han bosu atu bele simu materia iha prosesu ensinu aprendizajen ho diak,” dehan nia durante distribui ai-han ne’e iha Dare, kinta ne’e.
Dageng Liu, hatutan projetu pilotu ne’e sei implementa mós bá eskola sira seluk iha territóriu Timor-Leste iha 2021.
Iha fatin hanesan Vise Ministru Edukasaun Juventude no Desportu, António Guterres, reprezenta Governu konstitusionál daualu hato’o agradese ba parseiru WFP tanba apoiu ona ai-han ba estudante sira.
Governante ne’e mós apela ba inan-aman estudante sira atu prepara hahán ba oan sira antes bá eskola.
“Ohin ita-nia estudante sira hetan fornesimentu ai-han husi Word Food Program hodi lori bá uma. Ha’u husu ba inan-aman sira tenki fó atensaun ba kondisaun saúde oan sira-nian, labele husik sira kabun mamuk ba eskola tanba impaktu ba labarik sira sei labele simu materia ho diak,” dehan António Guterres.
Jornalista : Tomé Amado
Editór : Agapito dos Santos
