DILI, 16 agostu 2020 (TATOLI)–Ministru Prezidénsia Konsellu Ministru, Fidelis Manuel Leite Magalhães, hateten naturalamente Governu sei rona preokupasaun hosi Asosiasaun Halibur Defisiente Matan Timor Leste (AHDMTL). Tanba ne’e, Ministru Prezidénsia Konsellu Ministru, husu ba lideransa no estrutura AHDMTL atu iha lian partisipasaun fízika ne’ebé makaas liu.
Notísia Relevante: Primeiru-Ministru motiva no enkoraja AHDMTL atu kria banku
“Parte hosi Governu naturalmente sei rona preokupasaun hirak ne’e no sei halo esforsu ida para posivél dentru mandatu Governu ida-ne’e nian bele hadi’a liután buat lubuk ida, iha posibilidade no iha tempu badak ita sei hadi’a,” dehan Ministru Prezidénsia Konsellu Ministru, Fidelis Manuel Leite Magalhães, ba jornalista sira hafoin ensera kongressu konsellu fiskál AHDMTL ba 2020-2025 nian, iha salaun Esperansa Delta III, Dili, sesta ne’e.
Governante ne’e hateten, iha tinan kotuk orientasaun klaru hosi Premeiru-ministru (PM) no daudaun ne’e sei iha diskusaun nia-laran, tanba dezde inisíu kedas mandatu VIII Governu ne’e Priemiru-Ministru fó atensaun boot ba dezenvolvimentu liuliu iha komponente kapitál sosiál.
“Ita-nia objetivu atu asegura dezenvolvimentu ida-ne’ebé inkluzivu no dezenvolvimentu ne’ebé mak haree liuba dezenvolvimentu umanu ba ema-nia moris di’ak ka bem-estar,” dehan Ministru Prezidénsia Konsellu Ministru ne’e.
Fidelis hateten, Estadu Timor-Leste rekuñese la nega katak sei hanesan faze konstrusaun no sei faze inisía hela ne’ebé mak iha dezafiu barak.
“Ita rekonese katak ita-nia maluk barak moris ho defisiénsia ne’e iha difikuldade ho sentidu ne’ebé mak boot liu se kompara ho kondisaun di’ak sira seluk nian. Bainhira ita-nia dezafiu dezenvolvimentu ida-ne’e mak kondisiona mak difikulta ita atu bele lori dezevolvimentu ida-ne’ebé mak inkluzivu loloos ne’ebé partisipa preokupasaun ba vida digna timoroan independentemente ba nia estadu fíziku, rasa, relijiaun no seluk tan,” nia esplika.
Ministru ne’e hateten, dezenvolvimentu la’ós obra ida ne’ebé mak atu hotu maibé dezenvolvimentu ne’e sei iha kontinuasaun ne’ebé presiza sei hadi’a maibé ida-ne’e se possivél hadi’a bainhira rona mós sira-nia lian.
Notísia Relevante: Iha Timor-Leste, membru AHDMTL hamutuk na’in-14.828
Jornalista : Osória Marques
Editór : Cancio Ximenes
