DILI, 27 agostu 2020 (TATOLI)-Dekanu Fakuldade Medisina Siénsia Saúde, Universidade Nasionál Timor Lorosa’e (UNTL), José Dionísio Ximenes, observa katak dezenvolvimentu iha área saúde komesa la’o di’ak durante tinan 20-resin.
Governu liuhosi Ministériu Saúde halo ona dezenvolvimentu área saúde foka liliu ba prevensaun no promosaun saúde hanesan garantia kualidade hodi hakbesik saúde ba komunidade husi urbana to’o remotas liuhosi programa koidadu saúde primária no servisu ospitalár no seluk tan.
”Ita haree kapasitasaun ba iha área rekursu umanus ne’e mós la’o ona hanesan utilizasaun rekursu ne’e rasik iha Timor ita haree iha profisionál saúde iha misaun oioin maibé sira-nia profisaun ida de’it mak atu fó asistensia saúde liuhusi melloramentu ne’ebé mak sira oferese,” dehan nia ba Tatoli, iha ninia servisu fatin, sesta ne’e.
Mezmu nune’e, maibé nia hateten iha kestaun balun hanesan kria kondisaun ba doutór, enfermeiru, médiku sira atu hela bainhira destaka ba Postu Saúde sira iha área remotas.
“Governu tenki prepara mós kondisaun ba sira ezemplu Governu tenki kria kondisaun ba sira hanesan uma entaun ida ne’e mak ba oin Governu tenki haree,” tenik tan.
Jornalista : Felicidade Ximenes
Editór : Agapito dos Santos
