DILI, 21 setembru 2020 (TATOLI)-Kandidatu traballadór timor-oan hamutuk na’in-900 hosi munisípiu Dili, ne’ebé atu tuir programa seasonal worker, hahú tuir teste fizíku molok aranka no serbisu iha Austrália.
Sekretariu Estadu Formasaun Profisionál no Empregu, Alarico do Rosario, hateten teste ohin ba faze dahuluk no sei kontinua.
“Sira ohin tuir teste ba ohin loron na’in-900 de’it no teste ne’e ba aban no bain-rua,” dehan Sekretáriu Estadu Alarico, liuhosi ninia intervensaun bainhira hala’o abertura teste fíziku ba kandidatu traballadór iha Sentru Formasaun Polísia (CFP, sigla portugés) Comoro, segunda ne’e.
Bazeia ba planu Sekretaria Estadu Formasaun Profisionál no Empregu (SEFOPE) atu fó teste ba kandidatu traballadór iha munisípiu Dili hamutuk na’in-13.000 resin, maibé labele halo teste dala-ida tanba fatin CFP labele akumula hotu, tanba ne’e deside atu halo teste iha loron hira nia-laran.
Notísia Relevante: Kandidatu traballadór munisípiu Dili 13.423 tuir teste iha 21 setembru
“Ita labele akumula kandidatu traballadór sira hotu tanba fatin ne’e mós fó formasaun ba Polísia, ita tenke asegura fatin ne’e tanba ne’e SEFOPE deside fahe ba parte dadeer no lorokaik ba loron tuirmai,” nia akresenta.
Iha teste ne’e, SEFOPE envolve Polísia Nasionál Timor-Leste (PNTL) ho razaun atu evita irregularidade iha prosesu rekrutamentu.
“As vezes ema sempre dun SEFOPE katak rekrutamentu ba programa seasonal worker ne’e rasik sei mosu iregularidade, familiarizmu no seluk tan, atu resposta ida ne’e ami hakarak envolve Polísia iha prosesu rekrutamentu ne’e ba teste fízika atu haree kandidatu ne’ebé maka bele maka hili,” nia haktuir.
Governante ne’e husu ba kandidatu traballadór sira atu aproveita oportunidade no prepara físiku atubele kompete iha rekutamentu no kandidatu traballadór ne’ebé liu prosesu teste tenke hatudu komportamentu di’ak.
“Ha’u husu ba traballadór sira karik liu iha prosesu no ba servisu iha Austrália tenke hatudu hahalok hanesan ema traballadór, nune’e hetan osan hodi sustenta família iha uma-laran. Tanba ita ba ema-nia rai ne’e iha atu buka osan no buka esperiénsia, nune’e karik fila bele aplika filafali hodi kontribui ba prosesu dezenvolvimentu iha ita-nia rasik,” apela Sekretáriu Estadu ne’e.
Iha fatin hanesan, Diretór Empregu Exterior SEFOPE, Filomeno Soares, informa teste fíziku ne’e hosi instrutór ajente Polísia iha CFP.
“Realiza hosi instrutór ajente Polísia no akompaña hosi pesoál SEFOPE nian no teste físku ne’e rasik iha faze rua ka tolu ne’ebé parte instrutór sira define ona, hanesan push up ba mane dala-30 ba feto dala-15, halai tuir kampu laran ba mane dala-50 no feto-30,” nia esplika.
Nune’e mós, Segundu Komadante Jerál PNTL, Mateus Fernandes, husu ba kandidatu traballadór sira ne’ebé liu prosesu rekrutamentu ne’e atu hatudu responsablidade no morál bainhira halo servisu iha rai li’ur.
“Ita bo’ot sira mesak joven de’it, tanba ne’e ha’u husu karik liu iha prosesu ne’e hatudu hahalok di’ak iha ema-nia rai hodi filafali dezenvolve ita-nia rai, tanba ita bo’ot sira nu’udar aliserse ba nasaun ne’e,” nia apela.
Partisipa iha abertura ne’e Sekretáriu Estadu Komunikasaun Sosiál, Merício Juvinal dos Reis ‘Akara’, Adjuntu Komadante Jerál PNTL, komadante CFP no kargu xefia SEFOPE, Adjuntu CAC no Komisaun Funsaun Públika, sigla portugés).
Jornalista: Natalino Costa
Editora: Julia Chatarina
