PDHJ fó ona formasaun direitu umanu ba membru PNTL 386
DILI, 15 outubru 2020 (TATOLI)- Hosi 2015 to’o 2019, Provedoria Direitu Umanu no Justisa (PDHJ) ho Unidade Asesória Direitu Umanu (UADU) iha Timor-Leste fó ona treinamentu direitu umanu ba membru Polísia Nasionál Timor-Leste (PNTL) na’in 386; kompostu hosi feto na’in-55 no mane na’in-331.
Notísia Relevante : PDHJ kontinua fó formasaun direitu umanu ba membru F-FDTL
Provedora PDHJ, Jesuína Maria Ferreira, hateten, PDHJ hala’o akordu kooperasaun ho Sentru Formasaun Polísia (CFP) iha 2014 no renova fali kooperasaun ne’e iha tinan 2019.
“Durante tinan hirak nia laran hahú hosi 2015 to’o 2019, membru PNTL ne’ebé partisipa treinamentu ka formasaun direitu umanu hamutuk 386,” Provedora Jesuína Maria Ferreira, hateten bainhira hala’o abertura ba treinamentu kona-ba direitu umanu ba membru PNTL Munisípiu Ainaro, liuhosi nota imprensa ne’ebé Agência Tatoli asesu hosi Gabinete PDHJ, ohin.
Treinamentu ne’e partisipa hosi membru polísia hosi komandu PNTL Munisípiu Ainaro durante loron lima, hosi loron 12 to’o loron 16 outubru, tinan ne’e, iha salaun enkontru PNTL Munisípiu Ainaro.
Materia ne’ebé fasilitadór sira aprezenta foku kona-ba kna’ar PNTL ho direitu umanu, polisiamentu ho uza forsa, polisiamentu iha kapturasaun no detensaun, polisiamentu no direitu umanu ba ema vulneravel inklui mós matéria kona-ba jéneru.
Tinan ne’e, PDHJ ho nia parseiru sira halo formasaun ba PNTL iha munisípiu tolu; Ainaro, Aileu ho Liquiça.
Jornalista: Nelson de Sousa
Editór: Francisco Simões
