Reklamante rihun 2600 mak elizível atu simu subsídiu

AILEU, 15 outubru 2020 (TATOLI)–Vise-Ministra Solidaridade Sosiál no Inkluzaun (MSSI), Signi Chandrawati Verdial, informa totál reklamasaun hamutuk rihun 2600 mak elizível atu simu subsídiu $200 ne’e.

Signu Verdial hateten, lista reklamante ne’ebé tama besik rihun 15 ne’e barak mak dadus la klaru entaun devolve fali ba Ministériu Administrasaun Estatál (MAE) atu halo verifikasaun.

“Hosi verifikassun ba dadus reklamasaun hamutuk rihun 15 ne’e barak mak dadus la klaru entaun ita hela reklamante rihun 2600 ne’ebé mak elizível no sei simu subsídiu $200 iha semana ne’e,” Signi Chandrawati Verdial dehan ba jornalista sira hafoin partisipa selebrasaun Loron Internasionál Feto Rurál iha Postu Administrativu Laulara, Munisípiu Aileu, kinta ne’e.

Vise-ministra ne’e hateten, kona-ba pagamentu ba reklamasaun daruak nian ne’e, ohin, Señora Ministra Solidariedade Sosiál no Inkluzaun (MSSI), Armanda Berta dos Santos, asina ona depois sei haruka karta ba Ministériu Finansa.

“Ita-nia Señora Ministra Solidaridade Sosiál no Inkluzaun, ohin asina no hein sei haruka karta ba Ministériu parese semana ida-ne’e, osan tama ona ba banku depois ita bele selu ona,” nia dehan. 

Jornalista: Osória Marques

Editor: Cancio Ximenes