LIKISÁ, 15 outubru 2020 (TATOLI)–Sekretáriu Estadu Kooperativa (SEKoop), Elizário Ferreira apresia ho dezempeñu servisu feto nu’udár jerente kooperativa tanba bele halo jestaun di’ak liu kompara ho mane.
“Dezempeñu di’ak ne’e feto. Durante tinan 20 nia laran ha’u-nia esperiénsia iha vida kooperativa haree katak atividade negósiu di’ak liu maka feto sira. Kona-ba empresta osan no bele fó filafali di’ak liu ne’e feto kompara ho mane,” Sekretáriu Estadu ne’e tenik liuhosi diskursu iha ámbitu komemorasaun loron internasionál feto rurál iha suku Dato no Loidahar, ne’ebé realiza hosi Grupo das Mulheres Parlamentares de Timor-Leste (GMPTL), kinta ne’e.
Grupu parlamentár ne’e komemora loron mundiál ne’e hamutuk ho inan-feton iha suku Dato no Loidahar, postu administrativu Liquiçá, munisípiu Liquiçá, ho tema nasionál ‘investe iha ekonomia rurál sei hamosu rezisténsia no bele aselera dezenvolvimentu inkluzivu’ no ba GMPTL rasik ho tema ‘haforsa produsaun iha agrikultura, ai-han seguru, nutrisaun no harii reziliénsia ba COVID-19’.
Governante ne’e informa, daudaun rejista kooperativa hamutuk 214 ho ninia área operasionál barak liu ba kréditu.
Nia mós nota katak, hosi totál kooperativa ne’ebé eziste, dirijente feto sira-nia sede maiória uma andar, enkuantu dirijente mane sira-nia sede kooperativa hakdasak nafatin.
“Membru kooperativa iha Timór hamutuk 47.000 no husi númeru ne’e feto hamutuk 29.000, ida-ne’e hatudu dezempeñu feto nian di’ak liu kompara ho mane,” nia akresenta.
Durante ne’e nia observa, mane bainhira empresta osan hodi halo atividade negósiu dalaruma envolve iha jogu sira ne’ebé gasta osan, tanba ne’e mak dezempeñu finanseiru mane nian ladun di’ak.
SEKoop dezeña ona programa lubuk ida atu kontinua fó apoiu ba maluk kooperativa sira hanesan formasaun hodi kapasita feto sira bele envolve-an iha kooperativa.
“Ami la finansia sira ne’ebé iha hakarak atu hola parte iha kooperativa, maibé ami ajuda no fasilita sira liuhosi formasaun no asesu ba kréditu, nune’e ba futuru kooperativa ne’e bele iha sustentabilidade,” Elizário esplika.
Iha fatin hanesan, Reprezentante Prezidente Autoridade munisípiu Liquiçá, João Alegre, husu ba grupu kooperativa sira atu apoiu grupu feto potensiál no grupu feto rurál envolve-an iha kooperativa.
“Husu Governu liuhosi SEKoop atu fó formasaun ba feto rurál iha área kooperativa, nune’e sira hotu bele envolve-an iha kooperativa hodi bele kontribui ba ekonomia família,” nia dehan.
Jornalista: Natalino Costa
Editora: Julia Chatarina
