DILI, 31 outubru 2020 (TATOLI)—Prezidente Komisaun Organizadora ba Komemorasaun Masakre Santa Kruz 12 novembru ba dala 29 no selebrasaun loron nasionál juventude ba tinan ne’e, Zaulino Gomes da Silva, informa nia parte aprezenta proposta orsamentu ba Sekretáriu Estadu Juventude no Desportu (SEJD) ho montante rihun $ 47.235 no daudaun ne’e iha ona prosesu tranferénsia.
“Ita halo ona estimasaun ba orsamentu hodi komemora loron istóriku no selebrasaun loron nasionál ba juventude ne’e ho totál orsamentu rihun $ 47.235. ne’ebé ita fahe ba komemorasaun masakre 12 novembru purvolta rihun $14.956 selebrasaun loron nasional juventude nian rihun $22.505 inklui ba komisaun rasik purvolta rihun $9.474 maibé ida ne’e kategoria proposta de’it osan ita seidauk hetan husi Governu,” Ni informa ba Tatoli iha Sede Alumni Parlamentu Foinsa’e Timor-Leste (APFTL) Becora sesta (30/10).
Notísia Relevante :Jerasaun foun tenke banati espíritu Saudozu Sebastião Gomes
Programa lubuk ida maka Komisaun Organizadora trasa ona hahú husi kalan reflesaun no misa ba Saudozu Sebastião Gomes ne’ebé hala’o ona iha loron 27 no 28 fulan-outubru, semináriu nasionál, reflesaun no misa ba komemorasaun Masakre Santa Cruz 12 novembru, kompetisaun pintura, kompetisaun drum band, konsertu múzika.
Kompetisaun sertame sei hala’o iha loron 6 to’o 7 fulan novembru, limpeza jerál sei hala’o iha loron 9, semináriu nasionál sei hala’o iha loron 10, kalan reflesaun no misa agradesimentu iha loron 11, kompetisaun pintura, drum band no konsertu múzika sei realiza iha loron 12 fulan-novembru.
Atuál Prezidente Alumni Parlamentu Foinsa’e Timor-Leste (APFTL) ne’e dehan kria programa hirak ne’e ho objetivu atu kuda espíritu nasionalismu no patriotismu iha joven sira nian hodi tane no fó valór ba joven sira-nia luta iha tinan 29 ba ne’ebé hakarak liberta povu no nasaun.
Notísia Relevante :Parlamentu Nasionál presta omenajen ba saudozu Sebastião Gomes
Jornalista : Tomé Amado
Editór:Agapito dos Santos
