DILI, 16 novembru 2020 (TATOLI) – Ekipa futeból salaun (Futsal) mane TATOLI, IP “hakoi” nia esperansa hakat ba oitavu finál hafoin lakon ho nia adversáriu TIC Timor, IP ho golu 1-6.
Kontinuasaun torneiu Futsal Ministériu Asuntu Parlamentár no Komunikasaun Sosiál (MAPKOS), ohin loraik, iha kampu multifunsaun, Bebora, Dili, ekipa TATOLI,IP ne’ebé reforsa hosi jogadór Olandino da Costa, Joanico de Araújo ho nia kolega-sira seluk tan, tenke rekoñese ekipa TIC Timor, IP nia joga ho golu 1-6. Nune’e, obrigadu TIC Timor, IP mak ultrapasa ba oitavu finál hanesan juara pool ho pontu 10. Enkuantu ekipa GMN hanesan runner-up ho pontu 6 bainhira halakon nia adversáriu Business Timor ho score 8-0.
Golu vitória TIC Timor,IP hatama hosi jogadór Fidelis Belo (14) golu tolu. Geovanio de Jesus (4) golu rua no Henrique G (9) golu ida. Enkuantu golu úniku TATOLI hatama hosi Firman (9).
Jogu ne’e lao iha ámbitu “fair play” tanba ekipa rua halo kontra ho atake maibé parte rua simu lakon no manan. Mezmu nune’e, guarda rede TATOLI, Joanico de Araújo tenke simu kartaun mean no sai hosi kampu tanba komete erru hasoru jogadór TIC Timor,IP, Fidelis Belo (14). Nune’e, Bernardo Xavier (10) tenke substitui Joanico hanesan guarda rede.
Jornalista : Hortencio Sanchez
Editór : Francisco Simões
