DILI, 18 dezembru 2020 (TATOLI) -Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo ho Sekretáriu Estadu ba Komunikasaun Sosiál (SEKOMS), Merício Juvinal dos Reis “Akara”, sesta ne’e, iha salaun CNE, Dili, atribui sertifikadu ba formandu na’in-158 ne’ebé hetan ona formasaun hosi Sentru Formasaun Téknika iha Komunikasaun (CEFTEC, sigla portugés).
Formandu sira-ne’e mai hosi unidade formasaun komunikasaun relasaun publika no protokolu ho nivel 1 no 2, Formandu sira hosi unidade multimedia, Formadu sira hosi unidade formasaun televizaun, Formandu hosi unidade formasaun rádiu, Formandu sira hosi unidade hakerek imprensa, formasaun ba funsionáriu relasaun publika hamutuk 31 hosi munisipiu Ermera no Liquiça iha area multimedia no media sosiál.
Formandu sira ne’e tuir ona formasaun durante fulan neen (6) iha Sentru Formasaun Téknika iha Komunikasaun (CEFTEC, sigla portugés)
Ministru Francisco Martins da Costa Pereira Jerónimo iha nia diskursu kongratula formandu tanba konklui formasaun jornalizmu ho nivel 2 no parabens ba formadór sira tanba dedikasaun no responsabilidade fó ona funsaun ba iha formandu atus ida resin ne’ebé maka simu sertifikadu ne’e.
“Formasaun ne’ebé ita boot sira hetan ne’e la fasil, ita boot sira presiza kontinua aprende tan, tanba ema dehan hanesan ne’e saber não ocupa lugar aprender e para toda a vida, ha’u hanoin ho liafuan sira-ne’e motiva ita, biar ha’u hanesan ministru mós tenke aprende nafatin lee nafatin ita boot sira mós iha obrigasaun ida ne’e, atu lee nafatin aprende nafatin, tanba atu sai profisionál la fasil, atu sai ema ne’ebé matenek mós la fasil, tenke halo sakrifisiu barak,” hateten Ministru Francisco Jerónimo
Nia lia tun tan dehan, “ohin ita boot sira bele konklui ona ita boot sira nia kursu ho di’ak no ho kontente tanba sertifikadu ne’ebé rekoñese ita boot sira hanesan ema ne’ebé la’ós ona hanesan antes tama mai ho nivel seidauk iha, maibé agora ho nivel 2, sertifikadu ne’ebé ita boot sira iha sertifikadu ne’e mós serve atu bele aplika ita boot sira nia karreira profisionál bainhira ita boot sira tuir teste ruma.”
Governante ne’e kontinua husu atu formandu kontinua kadi nia kakutak nune’e hariku koñesimentu liu tan.
“Ita sira ne’ebé maka ohin loron iha ne’e aprende, remata kursu iha ne’e labele hanesan ne’e hela de’it, tanba katana karik kadi hela de’it, nune’e nia bele kro’at nafatin hodi tesi ai, ita mós hanesan ne’e, lorloron aprende nafatin, atu kakutak ne’e kro’at hanesan katana,” Ministru Francisco Jerónimo afirma tan.
Iha fatin hanesan Sekretáriu estadu ba komunikasaun Sosiál, Merício Juvinal dos Reis “Akara” sente kontente tanba CEFTEC hahú hosi 2016 to’o 2020 prodús ona formandu hamutuk 642, iha 2020 formandu hamutuk 188 maka tuir formasaun hosi unidade formasaun neen (6), ne’e duni iha 2020 de’it konsege prodús formandu 184.
SEKOMS haktuir tan pontu importante tuir mai maka depois halo analiza no halo avaliasaun ba formadu iha 2020, katak formandu sira barak ho idade produtivu, hahú ho tinan 26 to’o 36, sira-ne’e mak sai formandu ida ne’e halo Governu kontente tamba prodús rekursu umanu no produtivu.
Sekretáriu Estadu Merício Juvinal dos Reis “Akara” husu ba ofisial media ministériu nian atu hasai informasaun ho kualidade, nune’e bele fó vantajen ba públiku.
“Ita boot sira, liu-liu media ofisiál ministériu nian, ne’ebé maka servisu iha ministériu hotu-hotu, ita boot sira sai motór ba divulgasaun informasaun kada ministériu nian, tanba ne’e tenke hasai informasaun ho kualidade,” tenik Merício “Akara”
Nia dehan, formandu sira ne’ebé simu ona formasaun tenke ba implementa didi’ak, halo kobertura di’ak atividade governativa sira no formula didi’ak para sai notísia ne’ebé maka kualidade, promove parte pozitivu nasaun no Estadu nian.
“Kualidade informasaun ne’e atensaun maka’as ne’ebé ami rua ministru konkorda para atu enkontru regular ho media officer sira iha ministériu hotu-hotu para hetan orientasaun nafatin liga ona ba divulgasaun informasaun no diseminasaun informasaun iha de’it odamatan ida, labele idak-idak halo ninia divulgasaun informasaun ne’ebé maka kria polémika iha públiku,” SEKOMS Merício “Akara” informa.
Sertifikadu sira ne’e entrega diretamente hosi Ministru MAPKOMS, Francisco Martins da Costa Pereira Jerónimo, SEKOMS Merício Juvenal dos Reis “Akara”, Presidente Komisaun Funsaun Públiku, Faustino Cardoso Gomes, Diretora Nasional INDMO Isabel Fernandes de Lima, Diretór Ezekutivu TIC Timor, Roberto Caetano de Sousa Vicente, Diretór Ezekutivu Interinu Kamara Komérsiu no Indústria Timor-Leste (CCI-TL), Rui Alexandrino Pacheco no Prezidente Autoridade Munisípiu Ermera ho konvidadu sira seluk.
Jornalista: Natalino Costa
Editór: Francisco Simões
