DILI, 05 janeiru 2021 (TATOLI)—Mane na’in-tolu iha aldeia ida iha area jurisdisaun Munisípiu Ermera nian, tenke goja sira-nia vida iha sela detensaun polísia dezde loron 04 janeiru 2021 to’o agora.
Tansá mak sai nune’e, autoridade polísia Munisípiu Ermera hola medida detensaun ba mane “selvagem” na’in-tolu ne’e iha fatin akontesimentu bainhira sira hamutuk halo violasaun lisuk ba feto-ida ne’ebé idade tinan 29.
Rezultadu investigasaun provizóriu ne’ebé PNTL rekolla, katak vitíma AV sai hosi nia hela-fatin iha Dili ba Gleno atu kumprimenta nia família sira, maibé to’o iha dalan klaran mane na’in-tolu rasta nia hodi halo violasaun seksuál to’o vítima trauma.
Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo deklara, hafoin akontesimentu parte vítima rasik hato’o keixa ba PNTL Ermera hodi halo asaun detensaun ba suspeitu sira.
“Iha loron 04 janeiru 2021, iha kazu abuzu seksuál ida mosu iha Ermera, vítima ho inisiál AV, tinan 29, bá nia família iha Gleno. Vítima to’o iha ne’ebá hetan abuzu seksuál hosi mane na’in-tolu,” portavós PNTL Arnaldo de Araújo haktuir ba jornalista, ohin, iha Komandu Jerál PNTL, Dili.
Suspeitu na’in-tolu agora detein hotu ona iha sela polísia Ermera hodi submete ba investigasaun profunda. Nune’e, vítima AV rasik parte PNTL koordena ho Sentru Uma Mahon hodi fó konsolasaun espirituál ba vítima atu rekupera ninia mentalidade.
Suspeitu sira viola Kódigu Penál Timor-Leste artigu 172 ne’ebé ko’alia kona-bá se maka ho meiu sira referidu iha artigu anteriór, mantein ho ema seluk koitu vajina, koitu anal ka koitu orál ka obriga ema ne’e husik hatama objetu ruma iha ninia vajina sei hetan pena prizaun tinan-lima (5) to’o tinan-15.
Jornalista : Eugénio Pereira
Editór : Francisco Simões
