DILI, 23 janeiru 2021 (TATOLI) – Avansadu prinsipál AD SLB Laulara, Mouzinho de Lima (10), despede ona nia AD SLB Laulara hodi ba hamutuk fali ho Boavista FC Timor alias “Panteras Negras” iha époka ne’e.
“Ha’u husik ona SLB agora ba fali hamutuk ho Boavista. Ami seidauk treinu hamutuk tanba ha’u sei treinu hela ho selesaun nasionál, ha’u mós hetan hela aseitasaun hosi klube hodi treinu lai iha selesaun, ha’u sente kontente tebes bele hamutuk ho Boavista hein katak bele fó kontribuisaun ba Boavista,” Mouzinho de Lima, hateten ba Agéncia TATOLI iha kampu Federasaun Futeból Timor-Leste (FFTL), Dili, sábadu ne’e.
Notísia Relevante : Boavista FC Timor rekruta jogadór foun na’in-sia
Mouzinho kompromete sei hatudu performa ne’ebé di’ak hodi atinje objetivu Boavista nian iha Liga Futeból Timor-Leste (LFTL) no tasa 12 Novembru 2021.
Bainhira husik SLB jogadór selesaun nasionál ho númeru kamizola 10 ne’e haktuir, laiha problema ruma mak sai ,maibé nia mak hakarak sai duni hodi buka esperiénsia foun.
“Sai hosi SLB laiha problema ka fallansu ruma mak ha’u sai ne’e, maibé ha’u rasik mak hakarak muda ba Boavista,” nia hateten.
Kontratu ne’ebé Boavista haraik ba Mouzinho durante tinan ida, maibé saláriu jogadór ne’e lakohi fó sai tanba konfidensiál ba nia ho klube de’it mak hatene.
Jornalista : Hortencio Sanchez
Editór : Francisco Simões
