WFP apoiu ekipamentu protesaun ba SEPS

DILI, 25 janeiru 2021 (TATOLI)- Country Director World Food Programe (WFP) iha Timor-Leste, Dageng Liu, segunda ne’e, iha edifísiu Sekretáriu Estadu Protesaun Sivíl (SEPS), Dili, entrega material ekipamentu movel ba Sekretáriu Estadu Protesaun Sivíl (SEPS), Joaquin Gusmão.
Material doasaun ne’e mak hanesan mobile storage unidade tolu (3), loudspeaker wireless rua (2), megaphone Toa rua (2).
“Tenda movel ne’e ho medida metru 32 no luan metru 10 bele uza hanesan fatin armazén ba sasán nian no mós se karik iha dezastre ne’ebé akontese boot bele uza hanesan mós fatin ba iha evakuasaun ba vítima sira,” SEPS Joaquim Gusmão, esplika.
Nia dehan, apoiu ne’e bazeia ba pedidu SEPS nian iha semana hirak liubá hato’o ba WFP hodi aseita fó doasaun refere tanba iha nesesidade duni kada tinan Timor-Leste sempre enfrenta dezastre natural.
Joaquin Gusmão, lori Governu nia naran agradese ba apoiu sira hosi WFP ne’ebé sempre servisu hamutuk ba intervensaun dezastre natural sira akontese ba iha komunidade Timor-Leste.
Jornalista : Nelson de Sousa
Editór : Francisco Simões

