DILI,26 janeiru 2021 (TATOLI)—Ministériu Edukasaun Juventude no Desportu (MEJD), liuhosi Diresaun Nasionál Ensinu Rekorrente (DNER), hakarak integra labarik sira hosi Rejiaun Administrativa Oe-cusse Ambeno (RAEOA), ne’ebé faan manu-tolun iha dalan ninin sidade Dili nian, tama Ensinu Rekorrente.
“Diresaun ne’e iha ona planu atu hasoru-malu ho Prezidente Autoridade RAEOA, Arsénio Bano hodi diskuti kona-bá distinu labarik sira hosi Oe-cusse ne’ebé fa’an manu-tolun iha sidade Dili,” Diretór nasionál DNER, José Artúr Viana, ba jornalista Agência Tatoli iha serbisu fatin Vila Verde, tersa (26/01).
DNER preokupa ho situasaun ne’e, tanba diresaun ne’e rasik iha responsabilidade atu oinsá integra hikas labarik sira ne’e ba asesu edukasaun ne’ebé adekuadu.
“Ita preokupa, sira ne’e eskola ka la’e. Tanba ne’e, ita iha planu ho eskola Ensinu Rekorrente, ita sei ko’alia ho Prezidenti autoridade RAEOA atu diskuti asuntu ne’e,” nia hateten.
José Artúr Viana informa, MEJD liuhosi DNER iha polítika hodi estabelese sentru formasaun ba labarik sira ne’e, maibé depende mós ba sira oinsá bele hola parte iha prosesu ne’e.
“Ita bele kria sentru formasaun ba sira atu bele kontinua eskola, maibé la taka dalan atu sira kontinua buka moris ho maneira ne’ebé sira halo ona,” nia subliña.
Entretantu, tuir relatóriu hosi Komisaun Nasionál Direitu Labarik (KNDL) hatudu katak, to’o fulan setembru 2020, iha labarik hamutuk na’in 300-resin mak faan sasan iha estrada ninin sidade Dili nian hodi ajuda inan-aman, ne’ebé maioria mai hosi RAEOA.
Jornalista: Tomé Amado
Editór: Cipriano Colo
