DILI, 02 fevereiru 2021 (TATOLI)-–Diretór Ezekutivu Timor Port S.A, Rafael Ribeiro, informa projetu konstrusaun Portu Baía Tibar ne’ebé tuir planu sei ramata iha maiu 2022, daudaun ne’e atinje ona 42%.
Responsável hato’o kestaun ne’e hafoin informa progresu no dezafiu durante konstrusaun ba Primeiru-Ministru, Taur Matan Ruak, iha ámbitu enkontru.
“Progresu konstrusaun Portu Tibar to’o dezembru 2020 atinje ona 42%, ne’e ba konstrusaun ein jerál. Maioria konstrusaun ne’e hanesan kontinuasaun ne’ebé halo iha tinan kotuk hanesan aterra rai maioria hotu ona, agora kontinua baku ponte kais, komesa halo uma, edífisiu no armazen sira inklui atu instala mákina hiit kontetór sira,” Diretór Ezekutivu Timor Port, iha Pálasiu Governu, tersa ne’e.
Notísia relevante: Konstrusaun Portu Tibar Atinje Ona Porsentu 30
Nune’e, bainhira projetu Portu Tibar ne’e ramata iha tinan ne’e, iha inísiu 2022 halo ajustamentu hodi bele halo operasaun ona.
“Daudaun mákina hiit kontentór sira prosesa hela, ne’ebé espera tinan ne’e bele to’o ona iha Timor-Leste. Ami hakarak dezembru ne’e maioria hotu ona, nune’e inísiu tinan oin ita bele ajusta saida mak seidauk no maiu 2022 bele finaliza konstrusaun atubele portu hahú operasionaliza ona,” nia akresenta.
Difikuldade iha pandemia COVID-19, tuir resposável ne’e maka movimentasaun limitadu ne’ebé fó impaktu ba tékniku sidadaun estrajeiru husi sub kontratór Xina Harbour atu mai Timór hodi halo atividade no difikulta mós hatama ekipamentu sira.
Maibé nia dehan, Timor Port no sub kontratór sira konsege kontinua konstrusaun tanba traballadór hamutuk iha 1.000-resin husi estranjeiru no timor-oan kontinua atvidade konstrusuan.
“Ami nafatin tuir protokulu saúde ninian, obrigatóriu ba ema hotu husi jestór to’o traballadór sira atu prevene COVID-19,” nia akresenta.
Tuir planu, bainhira laiha COVID-19, projetu konstrusaun ne’e finaliza ona iha agostu tinan ne’e no inaugura hodi halo operasaun, maibé tanba situasaun atuál ne’ebé tarde oituan maka Governu prolonga tan durasaun serbisu ba 2022.
Daudaun orsamentu ba investimentu husi Governu Timor-Leste no Timor Port inklui Bolloré hamutuk millaun $100 no sei kontinua investe tanba tinan ne’e hodi hahú atividade másimu ba konstrusaun.
Projetu konstrusaun ho nível internasionál ne’e, ezekuta husi Timor-Port S.A ho modalidade Parseria Públiku Privada (PPP).
Ba konstrusaun ne’e, Governu aloka millaun $130, enkuantu Timor Port no Bolloré hamutuk millaun $140, ne’ebé totál millaun $270 ba faze inísiu.
Nune’e, totál investimentu orsamentu ba Portu Tibar to’o tinan 30 ho valór milaun $500.
Jornalista: Florêncio Miranda Ximenes
Editora: Julia Chatarina
