DILI, 07 marsu 2021 (TATOLI)–Ministériu Finansa (MF) hamutuk ho parseiru dezenvolvimentu hanesan Uniaun Europeia (UE) no Organizasaun Nasaun Unida (ONU) iha Timor-Leste sei lansa inisiativa kuadru finansiamentu nasionál integradu (INFF, sigla Inglés).
Tuir nota konjunta ne’ebé Agência TATOLI asesu iha domingu ne’e, seremónia lansamentu sei realiza iha segunda (08/03), hahú tuku 13:30 to’o 17:00, iha salaun MF, Aitarak-laran.
Kuadru finansiamentu nasionál integradu ne’e hanesan instrumentu planeamentu no implementasaun ida ba Governu no parseiru atu finansia meta iha Objetivu Dezenvolvimentu Sustentável (ODS) iha nível nasionál.
Kuadru ne’e sei analiza fonte finansiamentu tomak no meiu implementasaun, ne’ebé la’ós mai hosi finanseiru disponível iha nasaun, maibé dezeña estratéjia finansiamentu ida atu mobiliza no hasa’e rekursu adisionál, jere risku no alkansa prioridade dezenvolvimentu nasionál ne’ebé mak define ona iha Planu Estratéjiku Dezenvolvimentu Nasionál (PEDN) no ODS.
Hafoin seremónia lansamentu tuir kedan ho workshop INFF ba dahuluk, ho aprezentasaun hosi tékniku Reprezentante Sekretariadu INFF, World Health Organization (WHO), International Organization for Migration (IOM) no Sekretaria Estadu Ambiente (SEA).
Eventu ne’e sei partisipa hosi reprezentante sira hosi ministériu relevante, ONU, korpu diplomátiku sira no dirijente relevante hosi MF.
Timor-Leste hahú opta ODS iha tinan 2015, ho rezolusaun ida hosi Parlamentu Nasionál inklui despaisu hosi Governu liuhosi Primeiru-Ministru atu estabelese grupu traballu hodi halo aliñamentu entre PEDN no ODS ne’ebé mak opta.
Jornalista: Antónia Gusmão
Editora: Julia Chatarina
