DILI, 21 marsu 2021 (TATOLI)–Reitór Dili Institute of Technology (DIT), Alvaro Menezes Amaral, propoin ba Goveru liuhosi Ministériu Ensinu Superiór Siensia no Kultura (MESSK) no Ministériu Solidaridade Sosiál no Inkluzaun (MSSI) atu apoiu pulsa internet $50 ba kada estudante hodi bele fasilita asesu programa no matéria iha plataforma online.
“Ha’u husu MESSK no MSSI atubele apoia pulsa ba estudante sira atu asesu programa online ne’ebé hanaran Universidade ba Uma, tanba ita hatene situasaun serka sanitária konsege empede movimentasaun ema iha Dili, Baucau no Viqueque. Liu-liu estudante sira iha DIT barak mak la asesu programa online universidade iha uma tanba limitasaun pulsa,” Reitór DIT hateten iha serimónia distribuisaun foos ba estudante ne’ebé hela iha kost, iha salaun DIT Ai-mutin, domingu ne’e.
Notísia relevante: MSSI oferese foos ba estudante universitáriu 2.693 iha kost Dili
Governu hasai rezolusaun ne’ebé impoin serka sanitária no konfinamentu domisiliáriu jerál obrigatóriu iha munisípiu Dili hahú loron 16 marsu to’o 02 abríl no ba munisípiu Baucau no Viqueque hahú loron 16 to’o 29 marsu, tanba haree ba evolusaun COVID-19.
Maibé, hosi parte MESSK seidauk prevee orsamentu ba pulsa internet ba estudante universitáriu sira.
“Ami preokupa ho estudante DIT, ne’ebé barak moris hosi família ekonomia fraku no iha situasaun serka de sanitária ne’e, família barak mak labele hala’o sira-nia atividade negósiu hanesan baibain, tanba ne’e fó impaktu ba ekonomia família ne’ebé laiha rendimentu,” nia akresenta.
Tuir Reitór, kada estudante DIT kada loron tenke gasta pulsa $1 atu asesu ba matéria universidade ne’ebé dosente sira haruka.
“Semana ida ba kotuk, estudante barak mak hato’o sira-nia difikuldade tanba limitasaun osan atu sosa pulsa,” nia hatutan.
Tanba ne’e, nia husu ministériu kompetente atu tau konsiderasaun, nune’e bele fasilita estudante sira estuda iha uma.
Iha biban hanesan, Ministru Ensinu Superior Siénsia no Kultura, Longuingos dos Santos, hateten ministériu sei haree kestaun ne’e hodi buka solusaun.
“Ita la promote, maibé ita sei toma konsiderasaun ba pedidiu balun hosi DIT, ne’ebé husu apoiu pulsa ba estudante sira. Entaun, sei esforsu atubele hetan solusaun, maibé agora ita la prevee orsamentu atu sosa pulsa ba estudante sira,” nia hatutan.
Jornalista: Tomé Amado
Editora: Julia Chatarina
