DILI, 24 abríl 2021 (TATOLI)–Ema ho defisiénsia na’in-50 hosi Asosiasaun Defisiénsia Timor-Leste (ADTL), sábadu ne’e, simu vasina AstraZeneca iha Dili.
Notísia Relevante : ADTL halo pedidu ba MS EhD partisipa iha vasinasaun AstraZeneca
Diretór Ezekutivu ADTL, Cesário da Silva, informa ema ho defisiénsia ne’ebé simu vasina AstraZeneca ne’e, kompostu hosi mane na’in-30 no feto 20 ne’ebé konsidera mós hanesan liña frente. Tanba sira hala’o servisu iha terrenu hodi fahe apoiu solidariedade direita ba maluk defisiente-sira iha situasaun pandemia COVID-19 no kalamidade, foin lalais ne’e.
Cesário da Silva hateten, sira na’in-50 ne’e presiza duni simu vasina AstraZeneca atu bele evita no prevene propagasaun surtu COVID-19.
Umbelino Desterro Crus da Costa, hosi ONG East Timor Blind Union (ETBU) ne’ebé simu vasina AstraZeneca ne’e fó sasin katak nia sente liman todan bainhira simu vasina AstraZeneca, mezmu nune’e nia sente di’ak hela tanba aumenta nia umidade hasoru COVID-19.
“Ha’u simu tiha vasina AstraZeneca sente isin no liman todan hotu, maibé liu minutu 15, ha’u sente di’ak,” Umbelino Desterro Crus da Costa hateten.
Jornalista : Osória Marques
Editór : Francisco Simões
