DILI, 29 abríl 2021 (TATOLI)-Ekipa Sekretariadu Tékniku Programa Nasionál Dezenvolvimentu Suku (STPNDS), ohin, halo sosializasaun programa dezenvolvimentu suku no rekuperasaun ekonomia nian ba lideransa komunitáriu-sira iha Postu Administrativu Metinaro.
Administradór Postu Administrativu, Metinaro, Munisípiu Dili, Fausto Soares Dias hateten, sosializasaun ne’e hanesan mata dalan ida ba implementasaun Programa Nasionál Dezenvolvimentu Suku (PNDS), rekuperasaun infraestrutura bázika no ekonomia nian ba lideransa komunitária-sira no ekipa jestaun suku PNDS nian hosi Suku tolu Postu Administrativu Metinaro nian, oinsá bele implementa PNDS iha aldeia-sira ne’e ho di’ak.
“Matéria ne’ebé ita-nia ekipa STPNDS ko’alia mak oinsá knaar lideransa komunitáriu no ekipa jestaun programa dezenvolvimentu nasionál suku nian bele halo implementasaun PNDS iha aldeia no suku-sira la’o di’ak iha ida-idak nia suku,” Fausto Soares Dias informa ba Agência Tatoli liuhosi telefónika.
Nia hatutan bainhira programa nasionál dezenvolvimentu suku atu la’o di’ak, ida ne’e Prezidente Autoridade Munisípiu no Administradór Postu Administrativu-sira halo monitorizasaun ka akompañamentu programa refere iha ida-idak nia munisípiu no postu.
“Programa dezenvolvimentu suku ne’ebé implementa hosi PNDS ne’e la’ós foin hala’o, maibé hahú iha tinan 2013 to’o agora,” nia hateten.
Nia hatutan, hadi’a infraestrutura báziku no implementa programa dezenvolvimentu suku nian orsamentu sira ne’e la’o tuir nafatin iha programa dezenvolvimentu ne’ebé kada suku nian ne’ebé prevee $50.000 hodi implementa hela ba programa suku nian.
“Tinan ida ne’e planu prioridade ba programa Dezenvolvimentu Nasionál Suku maka reabilita ba sede Suku Venunuc no seluk tan. Maibé, hosi PNDS mós tinan ne’e sei harii Uma ba Kbiit Laek (UKL) iha Postu Administrativu Mentinaro,” nia dehan.
Kona-ba programa Uma ba kbiit laek sira (UKL), Postu Administrativu Metinaro kada Suku ida alvu ne’e aldeia ida, uma-kain tolu mak bele hetan UKL, entaun tinan ida ne’e Postu Administrativu Metinaro, Suku tolu ne’e Uma-kain sia mak bele hetan UKL.
Nia argumenta, PNDS hahú tama iha Postu Administrativu Metinaro iha susesu barak hanesan halo reabilitasaun Sede Aldeia sira, halo valeta, fura bee-moos ba komunidade, hadi’a ponte ki’ik-sira ne’ebé hetan estragu, konstrusaun dapur merenda eskolár, no reabilitasaun ba eskola balu ho seluk tan.
Jornalista : Arminda Fonseca
Editór : Francisco Simões
