DILI, 10 maiu 2021 (TATOLI) – Diretór Eskola Ensinu Sekundáriu Jerál (ESJ), Nobel da Paz, Dili, Pedro Nunes, informa ninia estudante hamutuk 3.380 no hosi totál númeru ne’e 81% foti ona rezumu matéria no falta de’it 19% mak seidauk.
“Ha’u ninia estudante purvolta 81% maka hetan ona distribuisaun rezumu matéria. Liuhosi distribuisaun grupu WhatsApp, balun mai foti direita iha eskola, agora sira 19% seidauk mai foti rezumu matéria ne’e tanba balun iha foho no balun iha Dili maibé laiha transporte,” Diretór Pedro Nunes, informa ba Agência Tatoli iha eskola Nobel da Paz, Quintal Boot, Dili, segunda ne’e.
Pedro Nunes afirma katak sira 19% ne’ebé seidauk foti rezumu matéria ne’e iha mós difikuldade tanba laiha telefone android, tanba ne’e parte eskola nafatin hein sira-nia prezensa iha eskola para atu hetan rezumu matéria ne’ebé prepara ona.
Nia dehan rezumu matéria ne’ebé parte eskola prepara ona hodi distribui ba alunu-sira hamutuk 11, kompostu hosi matéria dixiplina mak hanesan Lingua Ingles, Siénsia Fízika Naturaís-(Biolojia Fízika), Matemátika, Relijiaun Morál, Edukasaun Desportiva, Lian Tetun, Istória Jeografia, Edukasaun Sívika Sidadania, Edukasaun Artístika no lingua Portugés.
Jornalista : Tomé Amado
Editór : Francisco Simões