LIQUIÇA, 10 maiu 2021 (TATOLI) – Xefe Suku Ulmera, Postu Administrativu Bazartete, Munisipiu Liquiça, Martinho Correia, informa mota lima daudauk ne’e fó ameasa boot ba nia komunidade uma-kain besik 50.
“Iha ne’e iha mota lima mak halai hamutuk tun-mai, agora ameasa boot ba komunidade uma-kain besik 50 hanesan ne’e iha parte Kasait nian ne’e. Sé udan mai maka’as agora mota ne’e bele estraga komunidade nia uma no nia kintál,” Xefe Suku Ulmera, Martinho Correia informa ba Agência Tatoli iha Ulmera, segunda ne’e.
Nia dehan, mota lima ne’e mak hanesan, Mota Maneran, Kaireti, Emeta, Bilakoreia no Dirlolo mak daudauk ne’e ameasa hela komunidade nia uma bainhira udan boot.
“Semana kotuk ne’e mak sira hosi Gabinete Primeiru-Ministru nian tun mai haree. Sira hasai ona foto lori ba Dili. Hanesan autoridade lokál ami mós prepara nafatin pedidu haruka ba Governu sentrál atu bele mobiliza ekipamentu pezadu halo normaliza ba mota ne’e,” Martinho Correia hateten.
Jornalista : Hortencio Sanchez
Editór : Francisco Simões
