DILI, 02 juñu 2021 (TATOLI) – Família hosi estudante-sira Eskola Ensinu Sekundáriu Jerál (ESJ) 05 maiu, Becora, Dili, konsege halibur osan ho montante $50.000 hodi finaliza konstrusaun aula fun haat atu fasilita ensinu aprendizajen.
Diretór ESJ 05 maiu, Becora, Manuel Verdial hateten, fundus ne’ebé família estudante-sira nian apoiu ne’e kada fulan dolar ida ($1.00). Nune’e, hosi tinan tolu (2018-2020) kontribuisaun fundus hosi família estudante purvolta $50.000 hodi konsege ajuda konstrui tan aula haat ne’e.
“Ha’u implementa maneira kontribuisaun fundus hosi família estudante sira-ne’e tanba preokupa ho kondisaun sala aula haat ne’ebé grave ona. Ha’u husu kontribuisaun ne’e atu asegura oan sira labele hetan dezastre bainhira hala’o hela prosesu ensinu aprendizajen iha aula,” Manuel Verdial, informa ba Agência Tatoli iha nia servisu fatin, kuarta ne’e.
Maske konstrusaun aula foun haat ne’e finaliza ona, maibé to’o agora seidauk iha fasilidade. Nune’e, eskola husu ba Ministériu Edukasaun, Juventude no Desportu (MEJD) atu apoiu kadeira 120 no meza 120, kuadru haat ho komputadór rua atu kompleta fali fasilita iha sala haat ne’e.
Nia esplika maske prosesu ensinu prejensiál to’o agora seidauk realiza tanba serka sanitária no konfinamentu obrigatóriu, maibé eskola husu ona ba MEJD atu apoiu fali fasilidade hanesan kadeira ho meza hodi troka fali kadeira ho meza-sira ne’ebé aat kauza hosi inundasaun 04 abríl liubá.
Jornalista : Tomé Amado
Editór : Francisco Simões
