DILI, 04 juñu 2021 (TATOLI)-–Timor Gás no Petróleu, Empreza Públika (Timor GAP, E.P) kumpre ona kontratu ho Eletricidade de Timor-Leste (EDTL), hodi fornese kombustível ba sentrál elétrika Betano.
“Ami iha obrigasaun atu hatama litru millaun 32, ne’ebé foin lalais hatama liuhosi empreza MATO hamutuk litru millaun 1,5 no ohin faze dahuluk to’o ona iha Betano, hosi empreza fornesedór Singapura, hatama ona litru millaun 16 resin, ne’ebé falta litru millaun 13 mak sei fornese tan iha setembru no outubru, no kompleta tan iha tinan oin (2022),” Diretór Jerál Negósiu Downstream Timor GAP, Francelino Boavida, hateten ba Agência TATOLI, via telefónika, sesta ne’e.
Notísia relevante: EDTL-Timor GAP selebra akordu fornese kombustível iha sentrál elétrika Betano
Kombustível ne’e fornese diretamente hosi Kompañia refineria hosi PetroChina International (Singapore) Pte Ltd no Chevron iha Illa Jurong, ne’ebé tula ho ró dedikadu Glory Star iha loron 28 maiu no atraka iha Betano iha loron 04 juñu.
Maibe, tuir planu sei halo deskargamentu ba EDTL,E.P iha sábadu (05/06), hafoin ekipa empreza SACOM, Alfándega no Migrasaun halo inspesaun ba ró no kombustível ne’e rasik.
“Ami atrazu oituan tanba kestaun sira ne’e, maibé ami konsege fornese ba faze dahuluk hosi Singapura iha loron 28 maiu to’o iha Betano, iha kinta (03/06) no ohin ita halo deskargamentu litru millaun 16 resin ho kustu millaun $8,” nia akresenta.
Nia dehan, prosesu pagamentu ba fornesedór ne’e la halo diretamente, maibé liuhosi Banku ANZ ne’ebé sira mak hasai fasilidade kréditu ne’e, katak mina to’o Timór hafoin loron 30 mak halo pagamentu.
Tuir Diretór ne’e, Timor GAP prontu atu halo intervesaun ba sentrál elétrika Hera tanba kolabora hamutuk fornesedór internasionál ne’ebé iha refinaria rasik.
Notísia relevante: Timor GAP kontaktu kompañia hitu sai parseiru fornese mina EDTL
“Ami-nia dever fornese mina ba sentrál elétrika Betano, maibé iha situasaun emerjénsia, Timor GAP prontu atu hatama iha sentrál elétrika Hera, tanba ne’e bainhira EDTL, E.P husu, ami aseita bele halo,” nia garante.
Nune’e, Empreza Estatál ne’e prontu atu asegura eletrisidade iha rai laran hodi sidadaun tomak bele asesu ho di’k.
“Ami atu asegura enerjétika iha rai-laran tanba ami hakarak apoiu Estadu liuhosi EDTL, E.P hodi fornese mina ho kualidade no tuir padraun internasionál, inklui halo mós intervesaun ho presu ne’ebé kompetetivu atu setór privadu sira labele hasa’e presu tuir sira-nia hakarak no bele hamenus gastu hosi Estadu Timor-Leste,” nia subliña.
Kontratu entre parte rua asina iha 20 maiu, hosi Vise-Presidente Refined Products Trading, PetroChina International (Singapore) Pte Ltd, Hu Wei Qiang, no Prezidente Konsellu Administrasaun no CEO Timor GAP, Antonio de Sousa.
Nune’e, fornesimentu gazodutu ba sentrál elétrika Betano, hosi Timor GAP, hetan liuhosi kontratu ho PetroChina, hodi lori gazodutu 500PPM sulphur ho +/- 15,000 Kilolitru ba sentrál elétrika Betano.
Enkuantu, kontratu entre EDTL. E.P no Timor GAP, E.P, aliña ho objetivu empreza públika rua ba interese públiku, ne’ebé bazeia ba kontratu ne’e, Timor GAP, E.P sei fornese kombustível ba sentral elétrika Betano iha tinan-tolu nia laran, hahú hosi 2021 to’o 2023, ho kustu orsamentu millaun $59.
Jornalista: Florêncio Miranda Ximenes
Editora: Julia Chatarina
