DILI, 17 juñu 2021 (TATOLI)-Autoridade Rejiaun Administrativu Espesiál Oé-Cusse Ambeno no Zona Ekonomia Espesiál Sosiál Merkadu (RAEOA/ZEESM) fasilita tan Atoni-oan 115 fila ba Oé-Cusse ho Ró Success.
Notísia Relevante : Atoni-oan husu PA-RAEOA labele diskriminativu
Koordenadór Gabinete ZEESM, Nilton Pereira, informa Atoni-oan na’in-115, ohin duni, sei halo viajen ho ró Success fila ba Oé-Cusse hafoin sira submete ba teste swab iha Dili, segunda (14/06).
“Segunda liubá, ita-nia ekipa saúde Pilár tolu hosi Sentru Integradu Jestaun Krize (SIJK) mai halo teste swab ba etapa daruak nian ba ita-nia komunidade Oé-Cusse ne’ebé atu fila ba Ambeno, hamutuk na’in-81, no rezultadu ohin fó sai ema na’in-tolu (3) pozitivu COVID-19, ne’ebé sira ne’ebé negativu ne’e hamutuk 78, maibé komunidade balu ba hasai swab trata rasik sira-nia gia marxa iha SIJK entaun aumenta sa’e ba na’in-115 mak ohin halo viajen ba Ambeno,” Nilton Pereira informa ba Agência Tatoli liuhosi telefónika, kinta ne’e.
Nia hatutan, Atoni-oan ne’ebé pozitivu daudaun ne’e parte saúde atende ona sira tuir protokolu Organizasaun Mundiál Saúde (OMS) hodi submete ba izolamentu loron-14 maka sai fali. Tanba ne’e bainhira sira kumpre regra hotu ZEESM sei ajuda sira ba RAEOA.
Hirak ne’ebé negativu mós bainhira to’o iha Ambeno sei submete ba kuarentena loron-14 iha Ambeno molok sira atu sai ba ida-idak nia uma tenke garante duni sira negativu COVID-19 liuhosi teste swab dala ida tan.
Jornalista : Arminda Fonseca
Editór : Francisco Simões
