DILI, 22 juñu 2021 (TATOLI)-Adjunta Administradór Munisípiu Ainaro, Aguida Judete Mendonça, informa abitante hamutuk 2.285 iha Ainaro simu ona vasina AstraZeneca.
“Vasina AstraZeneca ba Ainaro hahú lansa iha loron 15 juñu 2021, ba ekipa liña frente, no segunda (21/06) hahú lansamentu ba komunidade jerál,” Aguida Judete Mendonça, ba Agência Tatoli liuhosi telefónika, tersa ne’e.
Nia hatutan, komunidade jerál ne’ebé daudaun ne’e simu ona vasina ne’e ba kategoria idózus no ema ne’ebé moras króniku sira hanesan, tensaun no rins no seluk tan.
“Vasina AstraZeneca ne’ebé haruka mai ami-nia munisípiu hamutuk doze 512 hosi ne’e mak distribui fali ba postu administrativu-sira iha Ainaro,” nia hateten.
Nia apela ba komunidade labele fiar lia falsu ne’ebé kontinua mosu hata’uk komunidade, maibé fiar metin informasaun ne’ebé ekipa task force COVID-19 fahe ona durante ne’e.
Jornalista : Arminda Fonseca
Editór : Francisco Simões
