DILI, 01 jullu 2021 (TATOLI)—Diretór Jerál Kooperasaun Dezenvolvimentu Institusionál hosi Ministériu Agrikultura no Peska (MAP), Cesar José da Cruz, hateten, parte ministériu hahú avalia progresu akordu kooperasaun sira ne’ebé durante ne’e halo ho parseiru internasionál sira.
“Enkotru ohin atu halo avaliasaun, ne’ebé diresaun sira iha Ministériu Agrikultura Peska mak halo avaliasaun hodi haree progresu akordu kooperasaun sira ne’ebé halo ho parseiru durante ne’e,” Diretór Jerál informa hafoin ramata enkontru iha salaun MAP, Comoro, kinta ne’e.
Nia konsidera, enkontru ne’e importante tebes atu haree ba koopersaun ne’ebé durante ne’e parte diresaun ida-idak iha ministériu halo.
“Ita halo akordu koopersaun barak, maibe ita seidauk realiza balun. Tanba ne’e hanesan oportunidade atu konsolida Diresaun Jerál no Diresaun Nasionál sira ne’ebé halo akordu kooperasaun sira liuhosi programa ministériu, atu ita bele buka meiu saida maka presiza halo tuir mekanizmu ne’ebé ita rasik iha,” nia akresenta.
Tuir Dirijente ne’e, kualker programa kooperasaun ho parseiru sira tenke iha kontinuidade.
“Reuniaun ne’e bele loke ita-nia hanoin hodi diresaun ida-idak bele aprezenta planu no programa karik iha akordu kooperasaun ho parseiru no ajénsia internasionál sira ramata ona, Governu bele finasia filafali, tanba ita hatene akordu balun másimu tinan-lima, hafoin ramata Governu maka finasia atu programa kontinua la’o,” nia subliña.
Jornalista : Natalino Costa
Editora : Julia Chatarina
