DILI, 05 jullu 2021 (TATOLI) –Dezde 2013, Governu suspende ka konjela kursu post-graduasaun bá mestradu no doutoramentu iha Universidade Nasionál Timor-Lorosa’e (UNTL) tanba la prienxe padraun hosi Ajénsia Nasionál Avaliasaun Akreditasaun Akadémiku (ANAAA).
Bainhira Agência Tatoli buka atu hetan klarifikasaun kona-ba to’o agora seidauk bele ativa kursu post-gradasaun iha UNTL ne’e, Diretora Jerál Ministériu Ensinu Superiór (DJMES), Maria Filomena Lay, konfesa katak, asuntu post-graduasaun iha UNTL ne’ebé suspende to’o ohin loron nia rasik seidauk prepara atu ko’alia ho razaun ta’uk ko’alia sala.
”Ha’u ta’uk ko’alia sala,” Diretora Jerál Ministériu Ensinu Superiór, Maria Filomena Lay, hateten hodi responde Agência Tatoli via telefone, segunda ne’e.
Hosi sorin seluk, Reitór UNTL, João Soares Martins, informa katak to’o agora UNTL labele halo inskrisaun foun bá kursu post-graduasaun tanba atividade kursu ne’e sei suspende hela.
“Iha IV Governu Konstitusionál konsege suspende tiha kursu post-graduasaun tomak iha UNTL hahú 2013 to’o ohin loron. Tan ne’e, ami la halo rejistu foun bá estudante sira iha kursu post- graduasaun bá mestradu no doutoramentu,” João Soares Martins hateten iha kampus UNTL.
João Soares Martins, iha kompromisu forte halo esforsu hodi servisu hamutuk ho Ministériu Ensinu Superiór atu hadi’a fali despaixu balun atu fó biban bá Universidade hodi hahú fali kursu post-graduasaun mestradu no doutoramentu iha UNTL.
UNTL iha esperansa boot ho Vise-Reitór foun asuntu Post-Graduasaun no Peskiza, Afonso de Almeida, nia prezensa iha UNTL atu bele servisu maka’as liután atu kursu post-graduasaun ne’e bele loke.
Vise-Reitór asuntu Post-Graduasaun no Peskiza UNTL, Afonso de Almeida, mós promote sei esforsu atu re-ativa kursu ne’ebé konjela tiha ona dezde 2013.
“Ami tenta atu hatene lai tanbasá mak kursu sira ne’e konjela, problema no razaun saida, atu nune’e, ami buka solusaun hodi bele submete fali bá Ministériu Ensinu Superiór hodi re-ativa fali kursu sira ne’e,” Afonso de Almeida hateten.
Jornalista : Tomé Amado
Editór : Francisco Simões
