VIQUEQUE, 05 jullu 2021 (TATOLI)— Programa Nasionál Dezenvolvimentu Suku (PNDS), halo kapasitasaun ba Ekipa Jestaun Suku (EJS) hamutuk na’in 15, mai hosi postu administrativu Viqueque Villa, munisipiu Viqueque.
Objetivu hosi kapasitasaun ne’e atu bele hasa’e koñesimentu kona-bá jestaun orsamentál no atividade ne’ebé realiza iha suku sanulu (10), iha postu adiministrativu Viqueque-Villa.
Notísia relevante:73% populasaun Viqueque asesu bee-moos
“Liuhosi formasaun ne’e bele hasa’e koñesimentu iha área akontabilidade, atu lori programa PNDS la’o iha suku no bele implementa tuir mata-dalan ne’ebé estabelese ona. ,” Diretór PNDS munisípiu Viqueque, Estevão de Carbalho, hateten iha sermónia abertura formasaun iha postu administrivu Viqueque-Villa, segunda ne’e.
Ekipa EJS ne’e hili hosi Konselu Suku no obrigasaun PNDS tenke fó kapasitasaun hodi prienxe format-sira no relatóriu implementasaun programa ne’ebé sei realiza iha suku.
Iha fatin hanesan, Administradór postu administrativu Viqueque-Villa, António Gregório, husu EJS tenke uza oportunidade iha formasaun ne’e hodi hasa’e konñesimentu, bainhira la komprende tenke husu fasilitadór sira atu esplika detalla nune’e labele mosu konfuzasaun.
Formasaun ne’e hala’o durante loron lima, hahú segunda no sei remata iha sesta 09 jullu 2021.
Formasaun ne’e iha área finansa no tékniku ba EJS hamutuk na’in-15 hosi suku Bahalauain, Bibileo, Caraubalu, Fatudere, Luca, Maluru, Uai-Mori, Uma Quic, Uma Uain Craic no Uma Uain Leten.
Jornalista: Vitorino Lopes da Costa
Editór: Cipriano Colo
