VIQUEQUE, 06 jullu 2021 (TATOLI)—Durante implementa Estadu Emerjénsia (EE) no implementasaun serka sanitária, sentru formasaun ne’ebé estabelese hosi Sekretária Estadu Formasaun Profisionál Empregu (SEFOPE) iha Beaço munisípiu Viqueque, la hala’o formasaun ba joven-sira.
“Sentru formasaun iha Beaço paradu. Tuir loloos ita tama ona iha síklu tolu, maibé agora daudaun ami nafatin halo preparasaun atu hala’o teste eskrita ba konkorrente formasaun-nian,” Diretór SEFOPE Viqueque, Simões da Silva, hateten ba jornalista Agência Tatoli, iha munisipiu Viqueque, tersa ne’e.
Notísia relevante:Vítima dezastre naturál 98 iha Viqueque simu ona materiál konstrusaun
Simões da Silva hatutan, Sentru formasaun Beaço iha programa lima (5) mak hanesan konstrusaun jerál, eletrisidade, karpintaria, kanalizasaun, soldadura no pedreiru.
Durante ne’e sentru formasaun ne’e enfrenta difikuldade liuliu falta fasilidade liuliu espasu ba joven munisípiu Viqueque ne’ebé hakarak tuir formsaun.
Nia dehan, sala-de-aula limitadu tebes entaun labele rekruta joven barak, iha primeiru siklu simu de’it na’in 25, kada área ida ema na’in-lima ba síklu II rekruta ema na’in-sanulu no ba síklu III makiha ona planu iha área ida ema na’in-20.
Sentru Formasaun SEFOPE Beaço establese iha tinan 2015, ne’ebé prodús ona formandu hosi síklu I to’o siklu II hamutuk na’in-75.
Rekezitu rejistu ba formasaun SEFOPE maka, tenke iha kartaun evidénsia hosi SEFOPE, sertidaun RDTL no Batizmu.
Jornalista: Vitorino Lopes da Costa
Editór: Cipriano Colo
