DILI, 22 jullu 2021 (TATOLI) – Treinamentu ba treinadór futeból feminina na’in-24 termina ona sira-nia formasaun iha Federasaun Futeból Timor-Leste (FFTL).
Prezidente FFTL, Francisco Jeronimo, informa formadór feminina sira-ne’e ba lisensa C hafoin tuir formasaun iha FFTL durante semana tolu no sira hotu pasa ho valor di’ak.
Francisco Jeronimo ba Agência Tatoli, kinta ne’e, informa formasaun ne’e haraik hosi treinadór profisionál hosi Malázia. Tanba ne’e formandu sira liu ho valor ne’ebé di’ak no bele sai ona treinadór ba klube feminina bainhira Liga Feto Timor (LFT) hahú agostu mai ne’e.
Iha sorin seluk formandu ne’ebé foin liu iha formasaun ne’e, Esmenia do Rosario da Costa hateten, kontente tanba iha oportunidade hodi tuir formasaun hodi sai treinadór ba klube.
“Iha treinamentu ne’e ami aprende materiál barak kona-ba futeból nian, oinsá mak fó treinu jogadór sira. Iha formasaun ne’e sente difisil maibé ami konsege esforsu no ohin loron termina duni ami nia formasaun ba lisensa C,” Esmenia do Rosario da Costa hateten.
Jornalista : Hortencio Sanchez
Editór : Francisco Simões
