DILI, 24 jullu 2021 (TATOLI)—Federasaun Futeból Timor-Leste (FFTL) simu fundu hosi organizasaun futeból ne’ebé adere hanesan Asian Football Confederation (AFC), ASEAN Football Federation (AFF) no International Federation of Association Football, ho totál millaun $1-resin kada tinan.
“Tinan-tinan sira fó osan mai ami millaun $1-resin, osan ne’e mai loloos iha tinan 2020 no iha tinan 2019 seidauk to’o ida-ne’e, enkuantu tinan 2020 sira halo aditoria hodi haree buat hotu la’o di’ak mak ita foin iha direitu simu hanesan ho nasaun seluk,” Prezidente FFTL, Francisco Jerónimo, informa ba Agência TATOLI, iha salaun City 8, Manleuana, sábadu ne’e.
Orsamentu ne’ebé FFTL hetan, hosi halo atividade jogu sira iha nível nasionál, munisípiu no rejionál.
“Osan mai iha tinan kotuk no ita halo jogu la’ós ho osan oituan, se ita haree no halo komparasaun iha Liga Futeból Amadora (LFA), iha tinan kotuk liubá osan besik millaun $1 ba de’it jogu, maibé ami ho millaun $1 la’ós halo de’it jogu, maibé halo buat lubuk boot ida hanesan formasaun ba treinadór arbitrajen, administrasaun no tuir saida mak FIFFIFA hakarak,” nia dehan.
Bainhira to’o tinan ikus mak la utiliza hotu osan, tenke hela ba FFTL hodi tau iha saldo, maski nune’e tuir Prezidente federesaun, orsamentu ne’ebé iha seidauk to’o atu kobre atividade hotu, maibé nafatin halo esforsu hodi jere ho kuidadu.
Hosi orsamentu ne’e, kada fulan FFTL distribui $1.000 ba asosiasaun hotu iha munisípiu hodi tulun ba administrasaun no atividade.
“Sira iha munisípiu, kada fulan ami fó subsidiu atu aluga netik uma ka sala ida ou rua provizóriu halo servisu hodi hein ba oin ita iha osan mak sei haree fatin no administrasaun nian,” nia akresenta.
Iha fatin hanesan, Prezidente Asosiasaun Futeból Viqueque, Cosme Sarmento, rekoñese kada fulan simu osan hosi federasaun, nune’e bele funsiona servisu administrasaun no atividade iha munisípiu.
“Orsamentu ne’ebé ami hetan hosi FFTL, fahe ba rua administrasaun 30% no ba atividade 70%, ne’ebé durante ne’e ami la’o tuir de’it orientasaun hosi federasaun,” nia tenik.
Iha sorin seluk, Prezidente Asosiasaun Futeból Manufahi, Arão Noe, hateten, orsamentu ne’ebé FFTL distribui labele halo atividade barak.
“Kada fulan ami simu $1.000 hosi federasaun, maibé osan ne’e só bele aloka de’it ba servisu administrasaun, maibé la to’o finansia ba liga ou torneiu balun,” nia dehan.
Tanba ne’e, nia husu ba FFTL atu aumenta subsídiu ba asosiasaun sira hodi bele hala’o atividade sira hanesan liga no tasa ruma iha munisípiu.
Prezidente asosiasaun fó ezemplu, iha fulan hirak, FFTL fó apoiu osan $5.000 ba asosiasaun Manufahi hodi loke torneiu ba jogu U-16, maibé osan la sufisiente no asosiasaun esforsu buka osan hosi li’ur hodi finansia torneiu ne’e.
“Ami hanoin apoiu orsamentu hosi AFC, FIFA no AFF montante boot, entaun ba oin se bele aumenta tan ami-nia subsídiu, mínimu liu $2.000, atu ami bele book-an hodi kria atividade,” nia sujere.
Jornalista : Hortencio Sanchez
Editora : Julia Chatarina
