LIQUIÇA, 06 agostu 2021 (TATOLI)-Sekretáriu Estadu Komunikasaun Sosiál (SEKOMS), Mericio Juvinal dos Reis “Akara”, hamutuk ho reprezentante instituisaun Estadu nian balun, no mós Konsellu Imprensa, sesta ne’e, halo diálogu komunitáriu iha Suku Fahilebo, Postu Administrativu Bazartete, Munisípiu Liquiça liuhosi programa ‘Naroman ba Suku’ hodi rona sira-nia povu preokupasaun.
Notísia Relevante : Komunidade Dato-Tolu agradese Governu lori Naroman ba Suku
Sekretária Estadu Merício Juvinal dos Reis “Akara” hateten, objetivu hosi diálogu ne’e oinsá lori Governasaun hakbesik ba povu, atu hatene kondisaun no fahe informasaun ba povu.
“Ita-nia komunidade mak nain ba Estadu, entaun liuhosi diálogu ne’e fasilita informasaun hosi Governu ba povu no povu ba Governu atu dezenvolve nasaun ida ne’e ho di’ak, tanba SEKOMS nia knaar mak atu fasilita informasaun, ba komunidade kona-ba lala’ok Governasaun,” Mericío Juvinál dos Reis “Akara” hateten.
Nia afirma komunidade atu asesu ba informasaun la’ós iha sidade de’it, maibé hahú hosi sidade to’o ba área rurál, direitu hanesan asesu ba informasaun.
Iha fatin hanesan, Xefe Suku Fahilebo, Marcelino da Cruz, hato’o agradese ba membru Governu sira ne’ebé mak marka ona prezensa iha diálogu komunitáriu refere hodi rona diretamente preokupasaun povu nian.
Iha diálogu refere, Xefe Suku Fahilebo hato’o preokupasaun kona-ba infraestrutura bázika hanesan, eletrisidade, bee-moos no edukasaun.
“Ami hato’o proposta hato’o dala barak ona ba Governu kon-bá ami povu nia preokupasaun, maibé laiha resposta. Fiar katak liuhosi programa Naroman ba Suku mai vizita ami ne’e bele rona ami-nia preokupasaun hodi bele hetan resposta,” nia dehan.
Kona-ba liña eletrisidade iha Suku Fahilebo rasik iha uma-kain 321 seidauk asesu ba liña eletrisidade.
Komunidade sujere ba Ministériu Edukasaun Juventude no Desportu (MEJD) loke tan eskola Pre-Sekundária ida iha Suku Fahilebo, tanba Suku Fahilebo nia-oan sira barak mak la’o ba eskola iha Munisípiu Ermera, Liquiça Villa.
Nune’e mós bee-moos tanba bainhira tempu bailoro-naruk komunidade refere arraska ba bee-moos.
Hatán, preokupasaun ne’e, Prezidente Konsellu Administrasaun Bee Timor-Leste, Carlos Peloi dos Santos hateten, nia parte sei aponta preokupasaun refere no ba oin sei tau mós prioridade.
“Preokupasaun sira ne’e ha’u anota, no ha’u husu ba komunidade iha Fahilebo atu identifika bee-matan ruma hodi bele hatudu mai ha’u atu bolu ha’u-nia tékniku sira mai haree, maibé husu mós ita tenke halo prezervasaun ba bee hanesan labele tesi ai no sunu rai arbiru,” nia hateten.
Kona-ba liña eletrisidade SEKOMS haktuir katak, molok mandatu Governu ne’e ramata, suku sira iha territóriu nasionál sei asesu ba liña eletrisidade, tanba ne’e tarde ka sedu, Suku Fahilebo mós sei hetan naroman hosi liña eletrisidade.
Suku Fahilebo kompostu hosi aldeia tolu hanesan, Fatuneso, Tuhilo Leten no Tuilo Craik ho totál populasaun 1.646 no total uma-kain 321.
Jornalista : Arminda Fonseca
Editór : Francisco Simões
