OÉ-CUSSE, 10 agostu 2021 (TATOLI)-Servisu Tékniku Administrasaun Eleitorál (STAE) Rejiaun Administrativa Espesiál Oé-Cusse Ambeno (RAEOA), semana-ida ona, hala’o resenseamentu eleitorál ba eleitór sira iha sub-rejiaun Pante Makasar ba preparasaun eleisaun Prezidensiál 2022.
“Daudaun ne’e ami hahú halo ona atendimentu ba eleitór sira konsentra iha eskritóriu ba sub-rejiaun Pante Makasar de’it hodi hein ekipamentu tanba seidauk haruka mai hosi nasionál,” Diretora STAE RAEOA, Luiza da Costa, informa ba Agência Tatoli iha Palaban, tersa ne’e.
Nia dehan, STAE RAEOA seidauk dezloka ba iha sub-rejiaun tolu hanesan, sub-rejiaun Oésilo, Pasabe no Nitibe tanba ekipamentu seidauk iha, nune’e ekipa sira konsentra de’it iha sub-rejiaun Pante Makasar, hodi hala’o atividade resenseamentu.
Resenseamentu eleitorál hahú hala’o iha sub-rejiaun Pante Makasar iha loron 02 agostu, no kada loron atende ema na’in-10, balu troka hela fatin, balu hadi’a no balu halo foun, no daudaun ne’e STAE RAEOA rejista ema na’in 100 ona.
Jornalista : Abílio Elo Nini
Editór : Francisco Simões
