DILI, 17 agostu 2021 (TATOLI) –Embaixada Repúblika Indonézia (KBRI/ Kedutaan Besar Republik Indonesia) iha Dili, Timor-Leste, tersa ne’e, selebra aniversáriu independénsia Indonézia ba dala-76 (17 agostu 1945-17 agostu 2021) nian liuhosi serimónia isar (içar) bandeira Merah Putih iha resintu KBRI, Farol, Dili.
Embaixadór Sahat Sitorus,nu’udar inspetór serimónia isar bandeira hateten, sidadaun hotu Indonézia nian iha rai-laran no rai-li’ur selebra loron importante no istóriku ne’e hodi halo reflesaun no hanoin hikas prosesu luta naruk ne’ebé eroi sira hatudu ona hodi soi povu Indonézia hosi kolonializmu.
“Selebrasaun loron independénsia ba tinan ne’e, ita selebra iha situasaun pandemia Covid-19. Agora moras ne’e nia númeru komesa aumenta, ita ho Timor-Leste kontinua servisu maka’as hodi kombate, la’ós ne’e de’it ba nasaun ASEAN tomak ne’ebé ita iha, ita nafatin servisu hamutuk hodi prevene moras ne’e, maski ema barak mak mate ona ba moras ne’e,” Sahat Sitorus hateten.
Ho loron especial ne’e, Indonézia nafatin hakat ba oin ho forte hodi dezenvolve nasaun ne’e.
Entermu relasaun bilaterál Timor-Leste ho Indonézia, Sahat Sitorus hateten, kontinua fortalese relasaun di’ak hodi servisu hamutuk iha área saida de’it, liu hosi promesa ne’ebé Prezidente Repúblika Indonézia Joko Widodo dehan nasaun rua tenke sai hanesan amigu ne’ebé fiar malu.
“Ita kontinua hametin relasaun, mai ita kontinua servisu hamutuk lori nasaun rua ne’e ba oin,” Sahat Sitorus hateten.
Jornalista : Hortencio Sanchez
Editór : Francisco Simões
