DILI, 19 agostu 2021 (TATOLI) – Central Training Institute for Education and Cooperation Field Manajer Korea International Cooperation Agency (KOICA) iha Timor-Leste, Gyuri Park, esplika projetu servisu hamutuk ho Ministériu Saúde iha Timor-Leste iha área espesífiku tuberkuloza (TBC) hodi bele kombate moras ne’e iha Timor-Leste.
“KOICA nia projetu ne’e atu ajuda programa tuberkuloza, programa ne’e involve hosi Klibur Domin, IOM no ami rasik, Klibur Domin ho IOM sira halai liubá detesaun kazu moras tuberkuloza nian, ami halai liubá oinsá fó formasaun ba pesoál saúde sira ne’ebé toma konta ba moras ne’e,” Gyuri Park hateten hodi responde Agência Tatoli iha edifísiu KOICA, Dili, kinta ne’e.
KOICA nia projetu ba tuberkuloza ne’e gasta ona osan hamutuk millaun $6 no hosi osan ne’e millaun $3 aloka ba IOM hodi halo detesaun ba kazu no hela millaun $3 hela ba KOICA hodi realiza ka jere ba programa tuberkuloza nian, liu-liu halo kapasitasaun ba pesoál saúde sira.
Bainhira ekipa KOICA ba munisípiu atu fó formasaun ba pesoál saúde sira involve mós autoridade lokál, atu nune’e, KOICA bele esplika kle’an projetu ne’ebé estabelese no kombate tuberkuloza iha Timor-Leste.
Alvu KOICA nian hodi hala’o servisu iha Timor-Leste iha munisípiu lima (5) mak hanesan, Dili hili Postu Administrativu rua Metinaro no Atauro, Ermera, Covalima, Baucau no Bobonaro.
Jornalista : Hortencio Sanchez
Editór : Francisco Simões
